प्रधानमन्त्रीया भारत भ्रमण लिपा जक सैन्य सामाग्री : रक्षामन्त्री
रक्षामन्त्री विद्यादेवी भण्डारीं भारतनाप सैन्य सामाग्री न्यायेगु सम्बन्धी छुं नं सम्झौता मजूगु धयादिसें प्रधानमन्त्रीया आसन्न भारत भ्रमण लिपा जक थुकीया बारे अन्तिम निर्णय जुइगु धयादिल ।
निवाः ताःहाकःगु भारत भ्रमण लिपा बिहीवाः नेपाः लिहां झायादिम्ह भण्डारीं अवरुद्ध सैन्य ग्वाहालियात निरन्तरता बीत भारत सरकार सहमत जुसां लिखित सम्झौता मजूगु धयादिल । वयेकलं धयादिल, - 'सैन्य सामाग्री ग्वाहालिया बारे सैद्धान्तिक सहमति न्हापा हे जूगु खः । आः नं दु ।' वयेकलं आः हे थ्व आवश्यक जू की मजू धइगु खँय् प्रधानमन्त्रीया भारत भ्रमणं फाइनल याइगु धयादिल ।
विमानस्थलय् पत्रकारत नाप खँल्हाबंला यानादिसें मन्त्री भण्डारीं थः भारत भ्रमणया झ्वलय् भारतं ल्वाभः ह्येत सम्झौता जूगु हल्ला सत्य मजूगु दाबी यानादिसें पुलांगु ग्वाहाली प्रकृयायात निरन्तरता बीगु सहमति जक जूगु धयादिल । वयेकलं सरकारयात आवश्यक जुसाः न्ह्याथासं नं ल्वाभः न्यायेफइगु धयादिल ।
अथेहे वयेकलं शान्ति प्रकृयायात निष्कर्षय् थ्यंकत थःगु भारत भ्रमण फलदायी जूगु टिप्पणी यानादिल ।
