झिंच्यागू दलया इनाप कथं राष्ट्रपतिं पलाः ल्ह्वंगु : देउवा

नेपाली कांग्रेसया वरिष्ठ नेता शेरबहादुर देउवां व्यवस्थापिका संसदय् दुथ्याःगु झिंच्यागू दलया इनाप कथं हे राष्ट्रपति डा. रामवरण यादवं थःगु पलाः ल्ह्वनादीगु खँ धयादीगु दु ।

झिन्हुन्यंकया युरोप भ्रमणय् झायादि न्ह्यः विमानस्थलय् पत्रकारत नाप खँल्हानादिसें नेता देउवां झिंच्यागू दलं समर्थन याःगु थुगु पलाःया बारे संसदय् सहलह यायेमाःगु छुं औचित्य मदुगु खँ धयादिल । वयेकलं थःगु कार्यकाल सिधेयेत्यंम्ह प्रधानसेनापतिया बारे विवाद मयायेत माओवादी नाप इनाप नं यानादिल ।

वयेकलं संकल्प प्रस्तावय् सहलह जुइमफइगु धयादिसें सेनापतिया विषययात कयाः विवाद यासाः देशय् अस्थिरता ब्वलनीगु धयादिल ।