गुरुमापाया अवशेष लुल

येँ (सन्ध्या टाइम्स)/ नेवाःतय् दथुइ किंवदन्तीया रुपय् जक न्यनेकने जुया वयाच्वंम्ह गुरुमापाया अस्तित्व पुष्टि यायेगु ज्याय् लगे जुयाच्वंपिं अनुसन्धानकर्तातय्सं गुरुमापा सम्बन्धी छगू तःधंगु प्रमाण लुइकूगु दु। उमिसं थःपिनि खोजया झ्वलय् आः नकतिनि गुरुमापाया अवेशष लुइकागु दावी याःगु दु ।

नेपालय् यति मालेगु अभियान ज्वनाः वयाच्वंपिं जापानया राष्ट्रिय पशुविज्ञान अनुसन्धान कोषया अनुसन्धानकर्तातय्सं थ्व उपलब्धी चूलाकूगु खः। उमिसं वंगु छुं ई न्ह्यवंनिसें तिंख्यःया याकः सिमा दुथाय् गाः म्हुयाः थ्व अनुसन्धान न्ह्याकाच्वंगु खःसा अन हे थ्व अवशेष लुया वःगु खः। उगु थासय् स्वयेबलय् थनिं १०,००० दँ न्ह्यःयापिं लुमिथरमन मनूयागु थेंज्याःगु अस्थिपञ्जर लुइकागु दावी उमिसं याःगु दु। गुरुमापायात नं तिंख्यः दथुइ हे यंकाः तयेयंकूगु धइगु बाखंया लिधंसाय् थ्व अस्थिपञ्जर गुरुमापायागु हे जुइमाः धकाः उमिसं दावी याःगु खः ।

गुरुमापाया बाखं येँया इतुम्बाहालय् च्वंम्ह केशचन्द्रलिसे स्वानाच्वंगु दु। केशचन्द्रलिसें हे गुरुमापा येँ देशय् दुहां वयाः मस्त नयाः आतंक मचे याःगु खः। थ्व जापानी अनुसन्धानकर्तातय्सं इतुम्बाहालय् नं तःदँ न्ह्यवंनिसें अनुसन्धान याना वयाच्वंगु खः। उमिसं अन नं गुरुमापा सम्बन्धी छुं सामग्री लुइके फइगु अनुमान याःगु दुसा थ्व निगुलिं थासं लुयावःगु सामग्री ज्वःलात धाःसा गुरुमापाया अस्तित्व पुष्टि याये फइगु आशा उमिसं यानातःगु दु।
तिंख्यः दथुइ लुया वल धाःगु अस्थिपञ्चर गुलि पुलां धकाः सीकेत उकिया कार्बन टेस्ट यायेगु ज्या जुयाच्वंगु खँ अनुसन्धानय् दुथ्याःम्ह छम्ह दुजलं धाःगु दु। तर उकिया लिच्वः वयेत धाःसा अझं छुं ई कायेफुगु वय्कःया अनुमान दु। कार्बन टेस्टया ज्याय् जापानी नापं फ्रान्सया विज्ञत नं संलग्न जुयाच्वंगु खँ नं वय्कलं कनादीगु दु ।

(पत्याः जुयादिया ला? थौं सायाःया लसताय् सायाः समाचार।)