सुरक्षा योजना विरुद्ध लिम्बुवान बन्द
येँ (सन्ध्या टाइम्स)/ सरकारं हःगु विशेष सुरक्षा योजनाया विरोध यासें राष्ट्रिय जनमुक्ति पार्टीलिसे सतीगु लिम्बुवान प्रान्तीय परिषदं पूर्वया गुंगू जिल्ला बन्द याःगु दु।
सरकारं हःगु सुरक्षा योजना जनजाति व आदिवासी विरुद्ध लक्षित जुयाच्वंगु दु धासें थ्व जिल्ला बन्द याःगु खः।
सरकारं हःगु विशेष सुरक्षा योजना जनजातियात दमन यायेगु ग्वसाः खः धासें परिषदं थ्व बन्दया आह्वान यानागु खँ धाःगु दु ।
बन्दया कारणं पूर्वया झापा, सुनसरी, मोरङ, ताप्लेजुङ, पाँचथर, इलाम, धनकुटा, संखुवासभा व तेह्रथुमया बजाः, कलकारखाना, यातायात व शैक्षिक संस्था बन्द जुयाच्वंगु दु। थुकिं यानाः अनया जनजीवन पूर्ण रुपं प्रभावित जूवंगु दु।
अथे हे परिषदं वि. सं. १८३१ साउन २२ गते लिम्बुवान राज्यलिसे तत्कालिन गोरखा राज्यं याःगु सम्झौतां लिम्बुवानया अस्तित्व तंकूगु धासें थौं हाकुगु न्हि कथं हनेगु खँ नं परिषदं जारी याःगु विज्ञप्तिइ न्ह्यथनातःगु दु ।
उखे सरकारं हःगु विशेष सुरक्षा योजनायात कयाः थारुतय्सं नं विरोध याःगु दु। थरुहट स्वायत्त राज्य प्रदेशया अध्यक्ष लक्ष्मण थारुं थुकिया विरोध याःगु खः ।
