सुरक्षा नीतिया विरोधय् पूर्वया गुंगू जिल्ला बन्द

आदिवासी जनजातितय्त दमन यायेगु ताः तयाः सरकरं विशेष सुरक्षा योजना हःगु धासें राष्ट्रिय जनमुक्ति पार्टी निकट लिम्बुवान प्रान्तीय परिषदया आव्हानय् बिहीवा: पूर्वया गुंगू जिल्ला बन्द जूगु दु ।

बन्दया कारण झापा, इलाम, मोरङ, सुनसरी, पाँचथर, धनकुटा, ताप्लेजुङ, संखुवासभा व तेह्रथुमया यातायता, कलकारखाना व शिक्षण संस्था पूर्णरुपं बन्द जूगु दु । परिषदया कार्यकर्तातय्सं थाय् थासय् सतक अवरुद्ध यानाः सवारी साधन आवगमनयात प्रभावित यानाब्यूगु दु ।

परिषदया केन्द्रीय अध्यक्ष सीपी तम्बाहाम्फें छगू विज्ञप्ति पिथंसें सरकारं विशेष सुरक्षा योजना हयाः आदिवासी जनजातितय्त दमन यायेत स्वःगुलिं बन्द आव्हान यानाःगु खँ न्ह्यथंनातःगु दु । सरकारं देयन्यंक शान्ति सुरक्षा सुदृढ यायेगु निंतिं साउन ११ गते निसें विशेष सुरक्षा योजना लागू याःगु खः ।