सरकारं क्षतिपूर्ति बीगू : गृहमन्त्री
गृहमन्त्री भीम रावलं भोटाहिटीइ कारया ठक्करं सिपिं खुम्हेसिया छेँजःपिंत क्षतिपूर्ति बीगू आश्वासन बियादीगु दु ।
बुधवाः सिपिनि छेँजःपिंन्त नापलाना गृहमन्त्री रावलं सरकारं आवश्वक गृहमार्य यानाः सिपिनि छेँजःपिंन्त क्षतिपूर्ति बीगू आश्वासन बियादीगु खः । छेँजःपिंसं गृहमन्त्री नाप कार चालकयात ज्वना कडा कारवाही यायेत माग याःगु दु । अथेहे उमिसं राज्यं क्षतिपूर्ति नं बीमाःगु माग याःगु खः ।
अथेहे बुधवाः गृहमन्त्रालयं छगू प्रेस विज्ञप्ति पिथंनाः भोटाहिटी क्षेत्रय् बा. ४. च. ८०३० नम्बरया कारया ठक्करं खुम्ह सिगु घटना प्रति दुःखः प्वंकूगु दु । विज्ञप्तिइ घटनाय् सिपिं प्रति मन्त्रालयं हार्दिक श्रद्धानजलि अर्पण व सिपिनि छेँजः प्रति समवेदना प्रकट यासें घाःपाः जुपिनि शीघ्र स्वास्थ्य लाभया कामना या:गु दु ।
विज्ञप्तिइ दुर्घटनाया सम्बन्धय् अविलम्ब अनुसन्धान यानाः कार चालकया ज्वना कानुन बमोजिम तत्काल कारवाही यायेत सम्बन्धित निकाययात मन्त्रालयं निर्देशन बीधुंकूगु खँ नं न्ह्यथंनातःगु दु ।
