माओवादी संयन्त्रय् नं मच्वनीगु
येँ (सन्ध्या टाइम्स)/ एनेकपा (माओवादीं) हानं याःगु आन्दोलन घोषणाया नापनापं सरकारं दयेकेत्यंगु उच्चस्तरीय राजनीतिक संयन्त्रणय् नं च्वने मखु धयाहःगु दु। उगु संयन्त्रणय् माओवादी अध्यक्ष प्रचण्डं थः नं च्वनेगु स्वीकृति बीवं सरकारं उकिया गठन तयारी याःगु खः। तर माओवादीं आः संघर्षया घोषणा यासें थःपिनि माग पूमवंतले अज्याःगु संयन्त्र जक दयेकाया छुं औचित्य मदु धाःगु दु।
माओवादीं संयन्त्रणय् च्वने मखु धायेवं सरकारं संयन्त्र गठनया लागिं यानाच्वंगु तयारी नं दिउवंगु दु। माओवादीं सरकारयात कन्हय् तकया अल्टिमेटम बिसें यदि थःपिनि माग पूमवन धाःसा हानं संघर्ष न्ह्याकेगु ख्याच्वः बिउगु दु। माओवादीं थःपिनि माग पूवंकेत सरकारयात बियातःगु लछि कन्हय् फुइत्यंगु दु ।
थःपिनि आन्दोलनया झ्वलय् आः माओवादीं सदन अवरुद्ध यायेगुनिसें कयाः सतकय् वयाः विरोध ज्याझ्वः तक यायेगु ग्वसाः ग्वयातःगु दु। माओवादीपाखें हानं सदन अवरुद्ध जुल धाःसा बजेट पारित यायेगु ज्या तकं प्रभावित जूवनीगु खँ धाःगु दु। प्रधानसेनापति प्रकरणय् राष्ट्रपतिं ल्ह्वंगु पलाः भिंकेमाः धकाः माओवादीं यानाच्वंगु मागय् छलफल तक नं याये फइ मखु धकाः कांग्रेसं अडान कायेवं माओवादीं थ्व आन्दोलनया ज्याझ्वः न्ह्यःने हःगु खः ।
