अन्तर्राष्ट्रिय कवि सम्मेलनय् नेपाली कवि

येँ (सन्ध्या टाइम्स)/नेपाःया वरिष्ठ कवि व लिजः नेपालभाषा कविता दबूया सल्लाहकार द्वारिका श्रेष्ठ चीनय् जुइगु निक्वःगु अन्तर्राष्ट्रिय कवि सम्मेलनय् ब्वति कायेत चीन झायादीगु दु। वय्कः नापं वय्कःया जहान बाखंच्वमि जलेश्वरी श्रेष्ठ नं चीन झाःगु खः। 'कुनघाइ इन्टरनेशनल लेक पोइट्री फेष्टिबल' चीनया जेनिङ्ग प्रान्तय् थ्वहे वइगु अगष्ट ७ निसें १० तारेख तक प्यन्हुयंकं जुइत्यंगु खः। लिजः नेपालभाषा कविता दबूया सल्लाहकार जुयाच्वनादीम्ह वय्कःयात नेपाः राष्ट्रया प्रतिनिधित्व याकाः उखे छ्वःगु खः। विश्व स्तरया उगु कवि सम्मेलनय् थीथी देया निसःम्ह कवि साहित्यकारपिंसं ब्वति काइगु खँ लिजः नेपालभाषा कविता दबूया नायः नविन चित्रकारं 'सन्ध्या टाइम्स'यात कनादिल ।