नेप्से कुहां वनेगु क्रम मदिउनि
येँ (सन्ध्या टाइम्स)/नेपाल स्टक एक्सचेन्जय् जुयाच्वंगु शेयर कारोबारया निराशा अझं चिला वने फयाच्वंगु मदुनि। शेयरय् बजाःया कारोबारं नेप्से कुहां वनेगु क्रम निरन्तर जारी हे जुयाच्वंगु दु। म्हिगःया कारोबारय् नं थुकिं निरन्तरता काःगु दु। नेपाल राष्ट्र बैंकं लागू याःगु न्हूगु मौद्रिक नीति सार्वजनिक जुइधुंकाः छन्हु जक नेप्से थहां वंगु खःसा वयां लिपा मदिक्क कुहां वयाच्वंगु दु ।
म्हिगः नं नेप्सेया कारोबारय् दक्वं समूहया परिसूचक कुहां वंगु दु। नेप्से शून्य दशमलव १५ अंकं कुहां वयाः ७०० दशमलव १५ अंकय् थ्यंगु दु। सेन्सेटिभ इन्डेक्स नं शून्य दशमलव ७५ अंकं कुहां वःगु दुसा फ्लोट नं १ दशमलव ९४ अंकं कुहां वल ।
नेप्सेय् म्हिगःया कारोबारय् वाणिज्य बैंक समूह ३ दशमलव ३८ अंकं कुहां वनाः ७२८ दशमलव २६ अंकय् थ्यंगु दु। विकास बैंक समूह नं ४ दशमलव ११ अंकं कुहां वयाः ७४१ दशमलव १५ अंकय् थ्यंगु दुसा छन्हु न्ह्यःया कारोबारय् थहां वंगु जलविद्युत समूह म्हिगः दकलय् अप्वः ८ दशमलव ४७ अंकं घटे जुयाः ९४८ दशमलव १९ अंकय् कुहां वल। अथे हे विमा समूह नं १ दशमलव ५६ अंकं घटे जुयाः ६४६ दशमलव २४ अंकय् कुहां वल ।
थहां वंगु उपसूचकत मध्ये फाइनान्स समूह ५ दशमलव ६८ अंकं थहां वनाः ६७८ दशमलव ४१ अंकय् व अन्य समूह ९ दशमलव ४ अंकं थहां वनाः ६७० दशमलव ८६ अंकय् थ्यंगु दु ।
मेखे म्हिगः नं नेप्से कुहां वंसा कारोबार कम्पनीया ल्याः धाःसा थहां वंगु दु। मुक्कं ख्वीच्यागू कम्पनीया छगू लाख गुइस्वद्वः व स्वीन्हय्गू कित्ता शेयर न्याये-मी जुयाः न्हय्गू करोड गुइनिगू लाख चय्प्यद्वः तका दांया कारोबार जुल। कारोबार जूगु कम्पनी मध्येय् लुम्बिनी फाइनान्सया शेयरधनीतय्सं प्रति कित्ता ५४/- लबः कायेत ताःलाःगु दुसा नविल बैंकया प्रमोटर शेयरया शेयरधनीतय्सं प्रति कित्ता ६२/- तका द्यापं फयेमाःगु दु ।
नेशनल हाइड्रो पावर कम्पनीं दकलय् अप्वः चय्न्यागू लाख स्वीस्वद्वः दांया कारोबार याःगु दु। लुम्बिनी फाइनान्सं अप्वः कमे याःगु दुसा लुम्बिनी बैंक अप्वः गुमे याःगु दु ।
