कारया ठक्करं खुम्ह सित

कपिलवस्तुइ पत्रकार सहित स्वम्ह सित

येँया रत्नपार्कय् बुधवाः सुथय् छगू निजी कारं ठक्कर नकूवलय् न्याम्ह भारतीय नागरिक नापं छम्ह नेपाली सिगु दु । ठक्करय् लाना मेम्ह छम्ह घाःपाः जूगु दु ।

बुधवाः सुथय् बा. ४. च. ८०३० नम्बरया कारं ल्यँय् न्यासी वनाच्वंपिं न्ह्यम्हेसित ठक्कर नकूगु खः । ठक्कर नकेवं वासः याकेत अस्पताल यंकेकूगु झ्वलय् खुम्ह ल्यँय् हे मदुगु खः । मदुपिं भारत विहारया धर्मनाथ सिन्हा, सितामढीया मदन गुप्ता, कृष्णादेवी व संजय गुप्ता, मोतिहारीया बिणा सिन्हा ख: । घटना सिम्ह नेपाली सिन्धुपाल्चोक सिपापोखरीया सुदन श्रेष्ठ जूगु खँ सिदुगु दु । अथेहे घाःपाः जुम्ह सितामढीया दिपक गुप्तायात वीर अस्पतालय् वासः याकातःगु दु ।

प्रहरीं घटनाय् संलग्न कारयात नियन्त्रणय् काःगु दुसा: कार शान्तिदेवी सिंहया नांमय् दुगु खँ प्रहरीं धाःगु दु । तर कार चालक विप्लवमान सिंह धासाः फरार जुयाच्वंगु दु । कार चालम सिंहया अबु प्रहरी डीआईजी खः ।

प्रहरीं बुधवाः सुथय् हनुमान ढोकाय् पत्रकार सम्मेलन यानाः दक्वसितं धैर्य धारण यानाः अनुसन्धान ज्याय् ग्वाहालि यायेत अपील याःगु दु । अथेहे प्रहरीं दोषी डीआईजीया काय्यात प्रहरीं बिस्कूकु खँया खण्डन याःगु दु ।‍

सिपिं न्याम्ह भारतीय नागरिकत येँय् व्यापर यानाः च्वंपिं जूगु खँ प्रहरीं धाःगु दु । घटना लिपा दोषीयात कारवाही यायेमाःगु माग यासें प्रवासी भारतीयतय्सं बुधवाः सुथंनिसें भोटाहिटी जमल व वीर अस्पताल क्षेत्रय् प्रदर्शन यानाच्वंगु दु ।

अथेहे कपिलबस्तुया शिवपुरय् जूगु मोटरसाइकल दुर्घटनाय् छम्ह पत्रकार नापं स्वम्ह सिगु दु । दिकातःगु ट्रकय् मोटरसाइकलं ठक्कर ब्यूवलय् एबीसी टेलिभिजनया कपिलवस्तु संवाददाता सीपी शर्मा नापं शिवगढीया गणेश विष्ट व हुरहुरीयाया प्रकाश खनाल मदुगु खः ।

पूर्व पश्चिक राजमार्गं शिवपुरपाखे चन्द्रौटाय् वयाच्वंगु लु. ४. प. १८०७ नम्बरया मोटरसाइकलं दिकातःगु ना. ३. ख. ६३६ नम्बरया ट्रकयात ठक्कर ब्यूगु खः ।

घटनाय् मदुम्ह शर्मा नेपाल पत्रकार महासंघ कपिलवस्तु शाखाया कोषाध्यक्ष व क्रान्तिकारी पत्रकार संघया कपिलवस्तु अध्यक्ष खः । अथेहे विष्ट व खनाल निम्ह शिक्षक खः ।