क्षमताया आधारय् सेनाय् समायोजन : परराष्ट्रमन्त्री

परारष्ट्रमन्त्री सुजाता कोइरालां एनेकपा (माओवादी)या लडाकूयात क्षमताया आधारय् जक नेपाली सेनाय् समायोजन यायेफइगु खँ धयादीगु दु ।

बुधवा प्रेस युनियन मकवानपुरं ग्वसाःग्वःगु पत्रकार नापलायेगु ज्याझ्वःलय् मन्त्री कोइरालां दक्वं लडाकूयात मखसें क्षमताया आधारय् समायोजन यायेगु व क्षमता मगाःपिंत समाजय् पुनस्थापना यायेमाःगु बिचाः प्वंकादिल ।

माओवादीं घोषणा याःगु आन्दोलनं देशय् अस्थिरता हइगु धयादिसें थुकीं संविधान निर्माण याये चाहेमजुपिंत ग्वाहालि जुइगु धयादिल । वयेकलं संविधान निर्माण ईलय् हे यायेत माओवादीयात सरकारय् ब्वति कायेत इनाप यानादिल । मन्त्री कोइरालां थ्वहे राष्ट्रिय सहमतिया सरकार जूगु धयादिसें माओवादी नं सरकारय् वयेमाः धयादिल ।