माओवादी पाखें औद्योगिक क्षेत्र बन्द
एकीकृत नेकपा (माओवादी) निकट औद्योगिक मजदुर संगठनं थः निम्ह कार्यकर्तातय्त प्रहरी ज्वंगु धासें मंगलवाः बालाजु औद्योगिक क्षेत्र बन्द याकूगु दु । माओवादी मजदुर कार्यकर्तातयसं मंगलवाः न्हिच्छि हे औद्योगिक क्षेत्रया मू ढोकाय् धर्ना च्वंगु खसाः सुनं मजदुरतय्त दुने वनाः ज्या यायेमब्यूगु खः ।
औद्योगिक क्षेत्र व्यवस्थापन लिमिटेडया महाप्रबन्धक गिरिराज भण्डारीयात आइतवा: सांघातिक आक्रमण यापिं निम्हेसित प्रहरीं ज्वंगु खः । माओवादीया भातृ संगठनं प्रहरीं ज्वना यंकूपिं थः कार्यकर्तातय्त बिना सर्त रिहा यायेमाःगु माग यासें औद्योगिक क्षेत्र दुने लाःगु शंकर ग्यास व हिमाल ग्यास कम्पनी बन्द याकूगु ख: । थ्व निगुलिं कम्पनीं अक्सिजन उत्पादन यानाः स्वनिगःया थीथी अस्पताल व क्लिनिकय् उपलब्ध यानावयाच्वंगु दु ।
महाप्रवन्धकयात कुटपिट यानाः प्रहरी ज्वना यंकूपिं विकास राई कोहिनुर कोल्ड स्टोर व खड्गबहादुर तामाङ नेपाल ग्यास उद्योगया मजदुर खः ।
