जनआन्दोलनया बलय् राष्ट्रिय सरकार गठन जुइगु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' जनआन्दोलनया बलय् आः राष्ट्रिय सरकार गठन जुइगु खँ धयादीगु दु । वयेकलं अज्याःगु सरकारया नेतृत्व माओवादीं हे याइगु जुसां थः सरकारय् मवनीगु धयादिल ।
मंगलवाः यलय् केन्द्रीय समितिया निर्णय बारे जानकारी बीत नेवाः व ताम्सालिङ राज्य समितिया कार्यकर्तातय्त प्रशिक्षण बीत ग्वसाःग्वःगु ज्याझ्वःलय् प्रचण्डं आः गठन जुइगु सरकार नागरिक सर्वोच्चता विरोधीतय्त सहभागी मयायेगु धयादिल । वयेकलं कार्यकर्तातय्त न्ह्याःगु कथंया आन्दोलनया निंतिं नं तयार जुइत निर्देशन बियादिल ।
प्रशिक्षण ज्याझ्वःलय् वयेकलं माओवादीया नेतृत्वय् सरकार गठन जुइगु खँय् ढुक्क जुइत इनाप यानादिसें शान्ति प्रकृया निष्कर्षय् थ्यंकेत व न्हूगु संविधान निर्माण यायेत माओवादी नेतृत्वया राष्ट्रिय सरकारया विकल्प मदुगु धयादिल ।
अध्यक्ष प्रचण्डं माओवदीलय् फुट ह्येत साम्राज्यावादी शक्तिं थःगु षड्यन्त्र यासां उपिं असफल जूगु टिप्पणी यानादिल । देय् दुनेया माओवादी विरोधी जक मखु अन्तर्राष्ट्रिय शक्ति केन्द्रया चाहाना विरुद्ध नं आः जुइगु संघर्ष केन्द्रीत जुइगु धयादिल ।
