फोरम लोकतान्त्रिकं प्यंगूगु तःधंगु दलया दाबी

मधेसी जनअधिकार फोरम लोकतान्त्रिकं संविधान सभाय् प्यंगूगु तःधंगु दलया दाबी याःगु दु ।

मंगलवाः फोरम लोकतान्त्रिकं प्यंगूगु तःधंगु दल दाबी याना नीच्याम्ह सभासदतय् हस्ताक्षर सहित संसद सचिवालय्लय् निवेदन ब्यूगु खः । सभासदतय्सं संविधान सभाया अध्यक्ष सुवास नेम्वाङ समक्ष फोरम लोकतान्त्रियात समर्थन दुगु धासें हस्ताक्षर लःल्हाःगु खः ।

फोरम आधिकारीता सम्बन्धी विवादय् निर्वाचन आयोगं उपेन्द्र यादवं नेतृत्व याःगु फोरमयात मान्यता ब्यूगु खः । लिपाः विजय गच्छदार पक्षं मधेसी जनअधिकार फोरम लोकतान्त्रिकया नांमं न्हूगु पार्टी च्याय्कूगु खः । विभाजन जुइ न्ह्य: फोरमय् न्य्यनिम्ह सभासदत दुगु खः ।

मधेसी जनअधिकार फोरम पाखें विभाजित उगु पार्टीयात बहुमत सभासदं समर्थन याःगुलिं थ्व प्यंगूगु तःधंगु दल जुइगु प्राय निश्चित जूगु दु ।