माओवादी कार्यकारी राष्ट्रपतिया पक्षय्
एकीकृत नेकपा (माओवादीं) थ्वस्वयां न्ह्यः याःगु निर्णय परिवर्तन याना न्हूगु संविधानय् कार्यकारी राष्ट्रपति जुइमाःगु अडान पेश याःगु दु । माओवादीं राज्य संघीय संरचनाय् जुसां केन्द्रीय स्वायत्त प्रणलीया नियन्त्रण यायेत राष्ट्रपति कार्यकारी अधिकार सहितया जुइमाःगु तर्क न्ह्यब्वःगु दु ।
संविधानसभाय् राज्यया शासकीय स्वरुप निर्धारण समितिया मंगलवाः च्वंगु बैठकय् माओवादीं केन्द्रीय समितिया बैठकया निर्णय कथं धासें कार्यकारी अधिकार सहितया राष्ट्रपति जुइमाःगु व राष्ट्रपति प्रत्यक्ष निर्वाचन मार्फत ल्ययेमाःगु खँ बः ब्यूगु दु ।
थ्वस्वयां न्ह्यः माओवादीं राष्ट्रपति संसदं ल्ययेमाःगु प्रस्ताव याःगु खसां लिपाः यक्वः पक्षं थुकीयात भिंकेमाःगु सुझाव ब्यूगुलिं प्रत्यक्ष निर्वाचन मार्फत ल्ययेगु कार्यकारी अधिकार सहितया राष्ट्रपतिया प्रस्ताव यानाःगु खँ माओवादी नेता टोपबहादुर रायमाझीं धयादिल ।
समितिया मेगू बैठक बिहीवाः च्वनीगु जूगु दु ।
