कार्यकारी अधिकार सहितया राष्ट्रपति
येँ (सन्ध्या टाइम्स)/कार्यकारी अधिकार सहितया राष्ट्रपतिया व्यवस्था जुइमाःगु अडान माओवादीं तःगु दु ।
थौं च्वंगु राज्यया शासकीय स्वरुप निर्धारण समितिया बैठकय् माओवादीं उगु प्रस्ताव याःगु खँ सीदुगु दु। माओवादीं थःपिनि केन्द्रीय समितिया निर्णय धासें उगु प्रस्ताव दर्ता याकूगु खः ।
माओवादीं राज्य संघीय संरचनाय् वनीबलय् केन्द्रं स्वायत्त प्रणालीयात नियन्त्रण यायेत कार्यकारी अधिकार सहितया राष्ट्रपतिया व्यवस्था जुइमाःगु तर्क न्ह्यब्वःगु खः ।
माओवादीं न्ह्यब्वःगु प्रस्तावय् राष्ट्रपति जुइम्ह मनू प्रत्यक्ष निर्वाचनं ल्ययेमाःगु खँ दुथ्याः। माओवादीया थ्व प्रस्तावयात कयाः आः च्वनीगु बैठकय् सहलह याइगु ज्याझ्वः दु ।
माओवादीं न्ह्यब्वःगु थुगु प्रस्तावय् मेमेगु राजनीतिक पार्टीया सभासद्तय्सं धाःसा असन्तुष्टि प्वंकूगु दु। माओवादीं राष्ट्रपति सम्बन्धी प्रावधान घरिघरि हिलाच्वन धासें थ्व असन्तुष्टि प्वंकूगु खः। माओवादीं राष्ट्रपति संसदं ल्ययेगु प्रावधान तयेमाः धकाः नं बिचाः प्वंकेधुंकूगु दु ।
