सेनाय् तामाङतय्त नं सम्मान
येँ (सन्ध्या टाइम्स)/ ताम्सालिङ स्वायत्त राज्यया माग यासें आन्दोलन याना वयाच्वंगु ताम्सालिङ संयुक्त संघर्ष समिति व सरकार दथुइ थौं सहमति जूगु दु ।
शान्ति तथा पुनर्निर्माण मन्त्रालयय् निगू पक्ष दथुइ जूगु वार्ताय् सरकारं संघर्ष समितिया माग पूवंकेगु सहमति क्यनेवं च्यागू बुँदे सम्झौता याःगु खः ।
वार्ताय् तामाङ बाहुल्य दुगु क्षेत्रय् नमूना विकास कार्यक्रम दयेकेगु, ताम्सालिङ चक्रपथ दयेकेगु, तामाङतय्त सेनाय् पिपा गोश्वारा दयेकेगु प्रथा खारेज यायेगु सहमति जूगु खः।
वार्ताय् सहभागी संघर्ष समितिया दुजः कुमार योंजनं 'सन्ध्या टाइम्स'यात कनादी कथं थौंया वार्ताय् तामांगत जक तयाः पिपा गोश्वारा (गुकियात थौंकन्हय् बन्दोवस्ती गण धाइ) य् जुयाच्वंगु भेदभाव अन्त्य यानाः अन च्वंपिं तामांगतय्त नं मेपिं सेना सरह सेवा व सुविधा बीगु सहमति जूगु दु। लिसें लिपा तामांगतय्गु मंकाः सहभागिता सहितया छगू बिस्कं गण दयेकेगु नं सहमति जूगु दु ।
सेनाया दर्जा मबिसे हाकीमतय्गु व्यक्तिगत ज्या यायेत पिपाया रुपय् सेनाय् तयातःपिं तामांगतय् ल्याः ५०० ति दु।
थ्व बाहेक तामांतय्सं तयाच्वंगु मेमेगु माग उकुन्हु हे पूवनेधुंकूगु दु ।
