नेप्से म्हिगः नं कुहां वन
येँ (सन्ध्या टाइम्स)/ नेपाल स्टक एक्सचेन्जय् शेयर कारोबार सन्तोषजनक जुइ फयाच्वंगु मदु। थुगु वाःया न्हापांगु न्हि ११ अंकं कुहां वंगु नेप्से परिसूचक म्हिगः नं ४ दशमलव ५५ अंकं कुहां वनाः ७०० दशमलव १६ अंकय् थ्यंगु दु। अथे हे सेन्सेटिभ म्हिगः नं २ दशमलव १२ अंकं कुहां वंगु दु ।
थुगु वाःया न्हापांगु न्हि शेयर बजारय् जूगु कारोबारय् दक्वं उपसूचकत नं कुहां वंगु खःसा म्हिगःया कारोबारय् व्यापारिक, जलविद्युत व अन्य समूह धाःसा थहां वंगु दु। व्यापारिक २ दशमलव २३ अंकं थहां वंगु दुसा छन्हु न्ह्यः कारोबारय् दकलय् अप्वः कुहां वंगु जलविद्युत समूह म्हिगः धाःसा ६ दशमलव ५१ अंकं थहां वनाः ९५६ दशमलव ६६ अंकय् थ्यंगु दु। अथे हे अन्य समूह नं ४ दशमलव ७ अंकं थहां वंगु दु ।
मेखे म्हिगः नं वाणिज्य बैंक समूह १० दशमलव २३या उच्च अंकं कुहां वयाः ७३१ दशमलव ६४ अंकय् थ्यंगु दु। विकास बैंक समूह १ दशमलव शून्य ३ अंकं कुहां वयाः ७४५ दशमलव २६ अंक, विमा समूह शून्य दशमलव १९ अंकं कुहां वयाः ६४७ दशमलव ९९ अंक व फाइनान्स समूह शून्य दशमलव शून्य ६ अंकं कुहां वयाः ६७२ दशमलव ७३ अंकय् थ्यंगु दु ।
नेप्से परिसूचक जक मखसे छन्हु न्ह्यःया तुलनाय् कारोबार नं कुहां वःगु दु। छन्हु न्ह्यः ख्वीगुंगू कम्पनीया कारोबार जूगु खःसा म्हिगः ख्वीन्यागू कम्पनीया छगू लाख स्वीप्यद्वः स्वसः व न्यय्गू कित्ता शेयरपाखें न्हय्गू करोड गुइखुगू लाख न्यय्न्याद्वः तका दांया कारोबार जुल ।
लुम्बिनी फाइनान्सया शेयरय् म्हिगः नं प्रति कित्ता ४९/- तका थहां वंगु दुसा नविल बैंकया शेयरय् प्रति कित्ता १४०/- तका कुहां वंगु दु। म्हिगः नं नेशनल हाइड्रो पावर कम्पनीया दकलय् अप्वः ३४,५०० कित्ता शेयर कारोबार जुल । कारोबारया ल्याखं दकलय् अप्वः सिटिजन्स इन्टरनेशनल बैंकं १ करोड २७ लाख ५६ हजार दां कारोबार याःगु दु। लुम्बिनी फाइनान्सं अप्वः कमे याःगु दुसा कुमारी बैंकं अप्वः गुमे याःगु दु ।
