सर्वदलीय बैठक निष्कर्ष विहीन
आन्दोलनया विकल्प मदु : भट्टराई
राजनीतिक गतिरोध अन्त्यया निंतिं दलत दथुइ सहमति मालेत च्वंगु सर्वदलीय बैठक विना निष्कर्ष क्वचाःगु दु ।
एकीकृत नेकपा (माओवादी)या अल्टिमेटम नापं आन्दोलनया घोषणा तकं यायेवं राजनीतिक गतिरोध अन्त्य यायेत सरकारं सर्वदलीय बैठकया आव्हान याःगु खः । मंगलवाः बानेश्वरया संविधानसभाया भवनय् च्वंगु सर्वदलीय बैठकय् सरकारय् दुथ्याःगु दलत व प्रमुख प्रतिपक्षी दल माओवादीं थःथःगु अडान मत्वतेवं बैठक बिना निष्कर्ष क्वचाःगु खः ।
बैठकय् माओवादीं राष्ट्रपतिया पलाःया विषयलय् संसदय् सहलह जुइमाःगु थःगु पुलांगु अडान काःगु खसाः सत्तासिन दलतय्सं सरकारं राष्ट्रपतिया पलाःयात समर्थन यायेधुंकूगुलिं थप सहलह यायेमफइगु अडान काःगु खः ।
बैठक जारी हे दुवलय् सरकारय् प्रतिनिधित्व याइपिं दलत गैरजिम्मेवार ढङं प्रस्तुत जूगुलिं राजनीतिक सहमतिया सम्भावना मदुगु धासें माओवादीया नेता डा. बाबुराम भट्टराई सहलह स्थल पाखें पिहांवंगु खः । वयेकलं बैठकय् थःपिंसं नागरिक सर्वोच्चता स्थापित यायेमाःगु माग न्ह्यब्वयाःगु तर कांग्रेसं माओवादीया माग पूवंनेधुंकूगु धाःगुलिं सहमतिया सम्भावन म्हो जूगु खँ धयादिल । वयेकलं सरकार थःपिनिगु मागया विषयलय् गैरजिम्मेवार जूगुलिं आन्दोलनया विकल्प मदुगु धयादिल ।
अथेहे कांग्रेस संसदीय दलया नेता रामचन्द्र पौडेलं बैठकय् थःपिंसं कांग्रेस, एमाले लगायत दलतय्सं राष्ट्रपतिया पलाःया विषयलय् सहलह आवश्यक मजूगु धारण प्वंकागू धयादिल । वयेकलं प्रधानसेनापतिया विषयलय् राष्ट्रपतिं ल्ह्वंगु पलाःयात पार्टीतय्सं समर्थन यायेधुंकूगुलिं थुगु विषयलय् सहलहया औचित्य मदुगु धयादिल ।
