दलत मिलेमजुसा देया निंतिं खतरा : खनाल
नेकपा (एमाले)या अध्यक्ष झलनाथ खनालं राजनीतिक दलत दथुइ राष्ट्रियताया मुद्दाय् मंकाः सहमति मजुसाः देया निंतिं खतरा जुइगु खँ धयादीगु दु ।
प्रेस चौतारी मोरङं मंगलवाः सुथय् विराटनगरय् याःगु ज्याझ्वःलय् न्ववानादिसें अध्यक्ष खनालं राष्ट्रियता, सार्वभौमसत्ता व स्वतन्त्रताय् गम्भीर संकट वःगुलिं राजनीतिक दलत मलेजुइगुया विकल्प मदु धयादिल । वयेकलं राजनीतिक दलत दथुइ विवादं देय् कमजोर जूगु धयादिसें राजनीतिक सहमति जुइमाःगु खँय् बः बियादिल ।
सत्ताया नेतृत्व यानाच्वंगु पार्टीया अध्यक्ष जुयादिम्ह खनालं राष्ट्रिय सरकार गठन याना विवादित विषयलय् सहमति मालेमागु आवश्यकत्ता प्वंकादिल । वयेकलं माओवादीयात नं वर्तमान सरकारय् दुथ्याकाः राष्ट्रिय सहमतिया सरकारया कुतः जुयाच्वंगु धयादिसें राष्ट्रिय सहमतिया सरकारया निंतिं एमाले न्ह्याःगु नं त्याग यायेत नं तयार जूगु धयादिल ।
