अमेरिका व भारतया निंतिं राजदुत नियुक्त
सरकारं भारत व संयुक्त राज्य अमेरिकाया निंतिं राजदुत नियुक्त याःगु दु । अथेहे सरकारं न्हूपिं नीनिम्ह सचिवतय् निंतिं मन्त्रालय बाडँभाट याःगु दु ।
मन्त्रिपरिषदया सोमवाः बहनी च्वंगु बैठकं भारतया निंतिं रुक्मसमशेर राणा व अमेरिकाया निंतिं शंकर शर्मायात नियुक्त याःगु दु । राष्ट्रिय सभाया पुलांम्ह दुजः राण नेपाल ओलम्पिक कमिटीया पुलांम्ह अध्यक्ष नापं राष्ट्रिय खेलकुद परिषदया नं पुलांम्ह सदस्य सचिव खः । अथेहे अर्थशास्त्री शर्मा राष्ट्रिय योजना आयोगया पुलांम्ह उपाध्यक्ष खः ।
कांग्रेसया कोटां राजदुत नियुक्त जुयादिपिं राणा व शर्माया नां मन्त्रिपरिषदया बैठकय् परराष्ट्रमन्त्री सुजाता कोइरालां प्रस्ताव यानादीगु खः ।
अथेहे सरकारं बामन प्रसाद न्यौपानेयात राष्ट्रपतिया ज्याकूथीया सचिव, त्रिचोलन उपरेतीयात मन्त्रिपरिषदया सचिव, नविन घिमिरेयात रक्षा मन्त्रालय, शंकर कोइरालायात उर्जा मन्त्रालय, नथुप्रसाद चौधरीयात उपराष्ट्रपतिया ज्याकूथी, युवराज भुसालयात वन मन्त्रालय, उदयराज शर्मायात वातावरण मन्त्रालय, बाबुराज आचार्ययात श्रम मन्त्रालय, प्रमोद कार्कीयात संघिय मामिला मन्त्रालय, श्याम मैनालीयात स्थानीय मन्त्रालयया जिम्मेवारी ब्यूगु दु ।
अथेहे सरकारं गृह मन्त्रालयया सचिवया जिम्मेवारी डा. गोविन्द कुसुमयात ब्यूगु दु ।
