माओवादी पाखें जनआन्दोलनया ज्याझ्वः सार्वजनिक
एकीकृत नेकपा (माओवादी) पाखें नागरिक सर्वोच्चता सहितया मंकाः राष्ट्रिय सरकार गठनया निंतिं धासें साउन २३ गते निसें न्ह्याइ कथं आन्दोलनया दक्वं ज्याझ्वः घोषणा याःगु दु । माओवादीं घोषणा याःगु ज्याझ्वः कथं जुलुस, सभा, धर्ना लिसें राष्ट्रपति व प्रधानमन्त्रीयात सार्वजनिक ज्याझ्वःलय् ब्वति कायेमबीगु तकं दु ।
पार्टीया सोमवाः च्वंगु स्थायी कमिटीया बैठकं प्रधान सेनापतियात थमौती याःगु पलाः बारे प्यन्हूयात दुने निकास पिहांमवःसाः न्यान्हूया न्हि निसें आन्दोलन यायेगु निर्णय याःगु खः । उकीया निंतिं दक्वं आन्दोलनरत पक्षयात दुथ्याकीगु ताः तयाः पार्टीया उपाध्यक्ष डा. बाबुराम भट्टराईया अध्यक्षताय् मंकाः राष्ट्रिय जनआन्दोलन नांया मोर्चा गठन याःगु दु । उगु मोर्चाया उपाध्यक्ष कथं अमिक शेरचन व महासचिव कथं नेत्रविक्रम चन्द च्वनादीगु दु ।
सोमवाः च्वंगु माओवादीया स्थायी कमिटीया बैठकं आन्दोलनया ज्याझ्वः क्वछीगु जिम्मा पार्टी उपाध्यक्ष भट्टराईयात ब्यूगु खः । आन्दोलनया ज्याझ्वः कथं साउन २३ गते व्यवस्थापिका संसदय् विशेष संघर्ष, २५ गते जिल्ला सदरमुकामय् प्रदर्शन याइगु जूगु दु । साउन २३ गते निसें भदौ १० गते तक प्रचारात्मक ज्याझ्वः यायेगु ज्याझ्वः क्वछीउगु दुसाः भदौ ११ गते निसें राष्ट्रपतिया दक्वं सार्वजनिक ज्याझ्वः बहिष्कार यायेगु व हाकूगु ध्वाँय् क्यनीगु, भदौ १५ निसें प्रधानमन्त्रीया सार्वजनिक ज्याझ्वः बहिष्कार व हाकूगु ध्वाँय् क्यनीगु, भदौ २० निसें मन्त्रीतय सार्वजनिक ज्याझ्वः बहिष्कार व हाकूगु ध्वाँय् क्यनीगु निर्णय याःगु दु ।
जनआन्दोलनया अध्यक्ष डा. भट्टराईं सोमवाः छगू विज्ञप्ति पिथंनाः सार्वजनिक याःगु ज्याझ्वःलय् भदौ २१ निसें देय्या प्रमुख सहरय् जनसभा यायेगु व असोज महिनाय् जनसांस्कृतिक व सम्पर्क अभियान संचालन यायेगु निर्णय याःगु दु ।
