माओवादी निर्णयया संसदय् विरोध
सत्तारुढ दलया सभासदतय्सं माओवादी केन्द्रीय समितिया बैठकं याःगु निर्णय प्रति आपत्ति प्वंकूसें विरोध याःगु दु ।
सोमवाः च्वंगु व्यवस्थापिका संसदया बैठकय् विशेष ई कयाः न्ववानादिसें नेपाली कांग्रेसया डा. रामशरण महतं माओवादीं थःगु नेतृत्वय् सरकार गठन मजुतल्ले आन्दोलन यायेगु घोषणा लोकतन्त्रया उपहास जूगु धयादिल । वयेकलं न्हूगु संविधान निर्माणया निंतिं सहलह जुयाच्वंगु ईलय् थः यथ्थे प्रान्तया घोषणा यायेगु निर्णय शन्ति प्रकृयाया विरुद्ध जूगु धासें विरोध यानादिल ।
अथेहे नेकपा (एमाले)या रामनाथ ढकालं थःपिं क्रान्तिकारी शक्ति धाइपिं कार्यकर्तात हे शान्ति सुरक्षाया स्यंकेगु ज्याय् लगेजुयाच्वंगु धासें माओवादीया आलोचना यानादिल । वयेलकं उच्च स्तरीय राजनीतिक संयन्त्रय् च्वनाः ईलय् हे संविधान निर्माण यायेगु ज्याय् ग्वाहालि यायेत माओवादीयात इनाप यानादिल । अथेहे वयेकलं माओवादीं आन्दोलन यायेगु धका: ब्यूगु ख्याच्व:या विरोध यानादिल ।
एकीकृत नेकपा (माओवादी)या अग्नी सापकोटां देश संकदय् लानाच्वंगुलिं सदन संचालन यायेत न्हपा जूगु सम्झौताया ई फुइत्येकाः नं सरकार व दलत गम्भीर मजूगु पाखे ध्यानाकर्षण यानादिल । वयेकलं राष्ट्रपतिया पलाःया बारे संसदय् सहलह जुइमाः धयादिल ।
