स्वयम्भु सुरक्षाय् तामांगतय् चिउताः
येँ (सन्ध्या टाइम्स)/ताम्सालिङ्ग संयुक्त संघर्ष समिति व सरकार दथुइ थौंकन्हय् जुयाच्वंगु वार्ताय् येँया स्वयम्भु चैत्यया संरक्षण व सम्बर्द्धन जुइमाः धइगु बुँदा नं तयातःगु खनाः येँया जातीय आन्दोलनकारीतय्सं न्ह्यसः तयाहःगु दु। स्वयम्भु महाचैत्य नेवाःतय् भूमिइ लाःगु धार्मिक सम्पदा खःसा अन तामाङ्ग स्वायत्त प्रदेशं छाय् चिउताः तःगु जुइ धकाः थ्व आशंकापूर्ण न्ह्यसः वःगु खः ।
थ्व बारे ताम्सालिङ्ग संघर्ष समितिया दुजः कुमार योन्जनयात थौं 'सन्ध्या टाइम्सं' स्वापू तयाः न्यनेकने यानाबलय् वय्कलं धयादिल, 'स्वयम्भु नेवाःतय् थें तामाङ्गतय् नं तःधंगु धार्मिकस्थल खः। उकिं न्ह्याम्हेस्यां याःसां उकिया सम्बर्द्धन जुइमाः। थज्याःगु सम्पदाया बारे वयागु प्रदेश थ्वयागु प्रदेश धकाः धयाच्वनेगु पाय्छि जुइ थें मताः ।'
स्वयम्भुया संरक्षण जुइमाः धायेगु हरेक बौद्धतय्के अधिकार दु धासें थःपिंसं नं वहे जक यानागु खँ नं वय्कलं धयादिल।
ताम्सालिङ्ग व सरकार दथुइ थौं ३ बजे हानं वार्ता जुइत्यंगु दु। पीपा प्रथा खारेज यानाः सेनाय् बिस्कं तामाङ्ग गण तयेमाः धइगु बुँदाय् खँ मिले मजुयाच्वंगु दु ।
