नेप्से कुहां वनेगु क्रम जारी
येँ (सन्ध्या टाइम्स)/नेपाल स्टक एक्सचेन्जय् जुयाच्वंगु कारोबारं नेप्से परिसूचक कुहां वनेगु क्रम अझं दिउगु मदुनि। वंगु छवाःया कारोबारय् सामान्य थहां वंगु नेप्से थुगु वाःया न्हापांगु न्हि ११ दशमलव ३ अंकं कुहा वयाः ७०४ दशमलव ७१ अंकय् थ्यंगु दु। अथे हे सेन्सेटिभ २ दशमलव ८१ अंकं व फ्लोट १ दशमलव शून्य ९ अंकं कुहां वल ।
थुगु वाःया न्हापांगु न्हिया कारोबारय् दकलय् अप्वः जलविद्युत समूह २७ दशमलव शून्य ४ अंकं कुहां वयाः ९५० दशमलव १५ अंक थ्यंगु दु। वयां लिउ फाइनान्स समूह १९ दशमलव ७८ अंकं कुहां वयाः ६७२ दशमलव ७९ अंकय् थ्यंगु दु। नेप्सेय् प्रमुख रुपं लिच्वः लाकाच्वनीगु वाणिज्य बैंक समूह नं १० दशमलव ४६ अंकं कुहां वयाः ७४१ दशमलव ८७ अंकय् थ्यन ।
अथे हे विकास बैंक समूह १ दशमलव शून्य ९२ अंकं कुहां वयाः ७४६ दशमलव ५६ अंक व विमा समूह ३ दशमलव १३ अंकं कुहां वयाः ६४८ दशमलव १८ अंकय् थ्यंगु दु। अन्य समूह नं १४ दशमलव १ अंकं कुहां वःगु दु ।
नेप्से परिसूचक कुहां क्रमं निरन्तरता कयाच्वंसां कारोबार कम्पनी धाःसा क्रमिक रुपं बढे जुजुं वनाच्वंगु दु। थुगु वाःया न्हापांगु न्हि नेप्सेय् ख्वीगुंगू कम्पनीया कारोबार जुल। कारोबार जूगु कम्पनीया ल्याखं छगू लाख चय्न्याद्वः व पीनिगू कित्ता शेयर न्याये-मी जुयाः झिगू करोड पीप्यंगू लाख व पीस्वद्वः तका दांया कारोबार जूगु दु। कारोबार जूगु कम्पनीत लुम्बिनी फाइनान्स लिमिटेडया शेयरय् प्रति कित्ता ४४/- तका थहां वंगु दुसा अन्नपूर्ण फाइनान्स कं.या शेयरय् दकलय् अप्वः प्रति कित्ता ४५९/- तका दां कुहां वल।
नेशनल हाइड्रो पावरया दकलय् अप्वः ५०,७०० कित्ता शेयर कारोबार जुल। बुटवल पावरं १ करोड २९ लाख ४१ हजार तकाया कारोबार याःगु दु। म्हिगःया शेयर बजारय् लुम्बिनी फाइनान्स कम्पनीं दकलय् अप्वः कमे याःगु दुसा अन्नपूर्ण फाइनान्स कम्पनीं दकलये अप्वः गुमे याःगु दु ।
