आन्दोलनया ज्याझ्वः तय यायेगु जिम्म भट्टराईयात
एकीकृत नेकपा (माओवादीं) नागरिक सर्वोच्चतया विषयलय् सत्तारुढ दलनाप जूगु सहमति कार्यान्वयनया निंतिं दबाव बीत देयन्यंक सचेतना अभियान सुरु याइगु जूगु दु ।
सोमवाः च्वंगु माओवादी स्थायी कमिटीया बैठकं सरकारनाप जूगु सहमति २२ गते तक कार्यान्वयन मजुसाः २३ गते निसें देय्न्यंक सचेतना अभियान संचलन यायेगु निर्णय याःगु दु । उकीया निंतिं स्थायी समितिं आन्दोलनया ज्याझ्वः तय यायेगु जिम्मा संयुक्त मोर्चाया संयोजक डा. बाबुराम भट्टराईयात ब्यूगु दु । मोर्चां बामपन्थी, देशभक्त व नागरिक सर्वोच्चताया पक्षधरत नाप समन्वय याना आन्दोलनया थप खाका तयार याइगु खँ पार्टी प्रवक्ता दिनानाथ शर्मां जानकारी बियादिल ।
आन्दोलनया न्हापांगु चरण अर्न्तगत सरकारया ज्याखँया विषयलय् जनस्तरयात जानकारी बीगु व लिपाः मंकाः संघर्षया ज्याझ्वः तय यायेगु खँ माओवादीं धाःगु दु । नागरिक सर्वोच्चता स्थापनाया निंतिं प्यन्हू दुने राष्ट्रिय सहमति मजुसाः आन्दोलनया घोषणा यायेगु ख्याच्व: ब्यूगु कन्हय् कुन्हु हे माओवादी स्थायी कमिटीया बैठकं आन्दोलनया ज्याझ्वः तय याःगु खः ।
