जनविद्रोहया ख्याच्वः माओवादीया धम्की जक : खनाल
नेकपा (एमाले)या अध्यक्ष झलनाथ खनालं एनेकपा (माओवादीं) ब्यूगु जनविद्रोहया ख्याच्वः धम्की जक जूगु धयादिल ।
सोमवाः सुथय् विराटनगर विमानस्थलय् पत्रकारत नाप खँल्हाबंला यानादिसें अध्यक्ष खनालं माओवादीं 'धाक-धक्कु' क्यनेवं ग्याये म्वाःगु टिप्पणी यानादिल । वयेकल माओवादीया थ्व अन्तिम विद्रोह मजूगु धयादिसें थंज्याःगु ख्याच्व वयातुं च्वनीगु तर उकीं सुंनं ग्याइ मखु धयादिल ।
माओवादीं आइतवाः पार्टी केन्द्रीय समितिया बैठकया निर्णय सार्वजनीक यायेगु झ्वलय् प्यम्हू दुने थःपिनिगु माग पूमवंसाः जनविद्रोह यायेगु ख्याच्वः ब्यूगु खः ।
एमाले अध्यक्षं एमाले, कांग्रेस व माओवादीया द्वन्द्वया कारणं हे देय् न्ह्यने न्ह्याये मफुगु खँ स्वीकार यानादिसें सकस्यां थ्व खँ ल्वमंकाः सहकार्यया ल्हा: बढे यायेमाःगु धयादिल । वयेकलं राष्ट्रिय सहमतिया सरकार आःया आवश्यक्ता जूगु धयादिसें उकीया नेतृत्वया एमालें हे याइगु धयादिल । वयेकलं याकनं निर्माण् जुइगु उच्चस्तरीय राजनीतिक संयन्त्रय् नं एमालेया हे नेतृत्वय् राष्ट्रिय सरकार गठनया निंतिं कुतः याइगु धयादिल । अज्याःगु सरकारय् माओवादी नं दुथ्याइगु दाबी खनालं यानादिल ।
