'प्यन्हू दुने राजनीतिक सहमित मजुसाः स्वक्वःगु जनआन्दोलन'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' प्यन्हू दुने राजनीतिक सहमति मजूसाः सतक व सदनं स्वक्वःगु जनआन्दोलनया तयारी यायेगु ख्याच्वः बियादीगु दु ।
लच्छि न्ह्यः निसें माओवादी मुख्यालयलय् च्वंगु पार्टीया केन्द्रीय समितिया बैठकया निर्णय सार्वजनिक यायेत आइतवाः याःगु पत्रकार सम्मेलनय् वयेकलं जनआन्दोलन शान्तिपूर्ण जुइगु तर दमन यायेत स्वःसाः जनविद्रोह यायेगु धयादिल । वयेकलं थःपिसं राष्ट्रपतिया पलाः व प्रधानसेनापतिया बारे संसदय् बहस याये देय् माःगु जक माग यानाःगु धयादिसें बहस याये नं मब्यूसाः जनता सुम्क मच्वनीगु धयादिल ।
माओवादीं नागरिक सर्वोच्चता स्थापना यायेमाःगु मू माग यासें सरकारयात ब्यूगु लच्छिया अल्टिमेटम प्यन्हू लिपाः फुइत्यंगु दु । प्रधानमन्त्रीं माधवकुमार नेपालं माओवादीया माग पुवंकेगु प्रतिबद्धता व्यवस्थापिका संसद मार्फत यानादीगु खः ।
पत्रकार सम्मेलनय् माओवादी अध्यक्ष प्रचण्डं शान्ति प्रकृया भंग जुइमाः व माओवादी सशस्त्र युद्धय् हानं लिहांवनेमाः धकाः मनंतुनां च्वंपिं तत्वत दुसां उमिगु अज्याःगु चाहना पूवंके मबीत थःपिं सचेत जूगु धयादिल । वयेकलं संविधान निर्माण व शान्ति प्रकृयायात तार्कित निष्कर्षय् थ्यंकेत राजीतिक संयन्त्रय् च्वनेत्यनाःगु तर कतामरी सरकारया छुं नं कथंया संयन्त्रय् मच्वनेगु धयादिल ।
लच्छि तक च्वंगु माओवादीया केन्द्रीय समितिया बैठकं मिथिला, भोजपुरा व अवध राज्ययात मिले याना मधेश राज्य समन्वय समिति गठन याःगु दु । अथेहे बैठकं पार्टी दुजःतय् निंतिं झिंन्यागू बुँदे आचार संहिता तयार याःगु दु । आचार संहिता कथं दक्वं केन्द्रीय दुजःतय् सम्पति पार्टीया नांमय् त्येगु, नेतातय् थिकेगु जीवनशैली नियन्त्रण यायेगु लगायतया दु ।
बैठकं नेपाःया सीमावर्ती क्षेत्रय् भारतं याःगु सीमा अतिक्रमणया विरोध यायेगु निर्णय याःगु दु । अथेहे बैठकं नकतिनि भारतया लालगढय् याःगु फौजी दमन व श्रीलंकाय् तामिल जातिया मुक्ति आन्दोलनया विरुद्ध याःगु दमनया विरोध तकं याःगु दु । नापं माघ १५गते माओवादीया महाधिवेशनया मिति नं बैठकं क्वछिउगु दु ।
