संविधान लिबाःगुलिं सभासद् सक्रिय
येँ (सन्धया टाइम्स)/संविधानसभाय् संविधान च्वयेगु निंतिं मस्यौदा बुझे याये ल्यं दुगु विषयगत समितिया सचिवत लिसे संविधानसभाया अध्यक्ष सुवास नेम्वाङं थौं सहलह ब्याकीगु जूगु दु ।
संविधानसभाया थीथी खुगू समितिं थःपिनि मस्यौदा इलय् तयार याये मफयेवं थौं सभाध्यक्षं उगु समितिलिसे सहलह ब्याकेत्यंगु खः। मस्यौदा दयेकेगु ज्या लिबाःगुलिं थम्हं सहलह न्ह्याकेत्यनागु खँ सभाध्यक्ष नेम्वाङं कनादिल।
संविधान दयेकेगु कार्यतालिका न्याक्वः तक संशोधन जुइधुंकाः नं मस्यौदा तयार मजूगुलिं इलय् हे मस्यौदा तयार यायेगु बारे सहलह यायेत थौं सचिवतय्त सःतागु खँ वय्कलं कनादीगु दु ।
अथे हे व्यवस्थापिका संसदय् थीथी मन्त्रालययात विनियोजन याःगु बजेट बारे थौं सहलह जुयाच्वंगु दु। थौं श्रम तथा यातायात व शान्ति तथा पुनर्निर्माण मन्त्रालयया बजेट बारे सहलह जुयाच्वंगु खः ।
