बाह्य चक्रपथ विरुद्ध नाराबाजी
येँ (सन्ध्या टाइम्स)/ सरकारं दयेकेत्यंगु बाह्य चक्रपथ गुगु थासं शुरु यायेगु धकाः तयारी यानाच्वंगु खः उगु थाय्या स्थानीय जनतां दयेके मबीगु निर्णय याःगु दु। थ्व चक्रपथया आरम्भ सतुंगः (६.५ किमि) निसें यायेगु धकाः ताः तयातःगु खः। तर वंगु विहीवाः सतुंगलय् जूगु स्थानीय मनूतय्गु भेलां बाह्य चक्रपथं स्थानीय किसानतय् हित याइ मखु धासें थःगु लागाय् चक्रपथ दयेके बी मखु धकाः निर्णय याःगु खः।
बाह्य चक्रपथ आयोजनाया हे ग्वसालय् उगु भेला जूगु खः। उकी सतुंगः नापं थानकोट, मातातीर्थ, महादेव स्थान, बाडभंज्याङ्ग व मछेगां गाविसया स्थानीय मनूतय्गु उपस्थिति दुगु खः। खास यानाः लँ निर्माण यायेमाः धकाः स्थानीय जनताया स्वीकृति कायेत उगु भेला सःतूगु खः। तर भेलाय् वःपिंसं आःया लागिं सतुंगः लागाय् थ्व लँ दयेके बी मखु धकाः निर्णय यात। उमिसं आयोजनाया माइन्युट सफुली हे लँ दयेके मजिउ धइगु व्यहोरा च्वयाः उपस्थित सकस्यां हस्ताक्षर याका छ्वःगु खः ।
लिसें भेलाय् वःपिंसं सतुंगलय् चायेकातःगु बाह्य चक्रपथ आयोजनाया ज्याकू नं तुरुन्त बन्द यायेमाः धकाः माग याःगु दु। उगु ज्याकू बन्द या धकाः भेलाय् नाराबाजी समेत जूगु खः। आः गाविस मार्फत उगु ज्याकू बन्द यायेगु प्रक्रिया न्ह्याइ धाःगु दु ।
बाह्य चक्रपथं स्थानीय किसानतय् हित मजू धासें किपू नापं मेमेगु लागाय् नं विरोध जुयाच्वंगु दु ।
