उपराष्ट्रपतिं हानं सपथ कायेमाःगु माग
थीथी दलया सभासद्तय्सं सर्वोच्च अदालतया फैसलाया सम्मान यासें उपराष्ट्रपति परमानन्द झां हानं सपथ कायेमाःगु बिचाः प्वंकूगु दु । उमिसं तत्काल सपथ ग्रहण याना सर्वोच्चया आदेश पालना यायेत नं इनाप याःगु दु ।
आइतवाः व्यवस्थापिका संसदया शुन्य ईलय् न्ववापिं थीथी दलया सभासदतय्सं संविधानया संरक्षण यायेमाःम्ह मनूखं हे सर्वोच्च अदालतया अपमान जुइ कथंया ज्या याःगु व अभिव्यक्ति ब्यूगु धासें आपक्ति प्वंकूगु खः ।
बैठकय् नेकपा (एमाले)या कुलप्रसाद नेपाल, एनेकपा (माओवादी)या खिमलाल देवकोटा, चुरेभवर एकता पार्टीया केशव मैनाली लगायतं उपराष्ट्रपितं हानं सपथ कायेमाःगु बिचाः प्वंकूगु खः । उमिसं उपराष्ट्रपति थंज्याःगु गरिमामय पदय् च्वनाच्वम्ह झां नं सर्वोच्चया आदेश माने यायेमखु धइगु कानुनी शासनया उपहास जूगु बिचा: प्वंकूगु ख: ।
अथेहे बैठकय् माओवादीया सभासद् कल्पना धमलां झाडापखालाया कारणं बिरामी जुपिंनि उपचारया निंतिं सरकार गम्भीर मजूगु द्वपं बियादिलसाः कांग्रेसया सभासद् गगन थापां विदेश भ्रमणं लिहांझाम्ह स्वास्थ्य मन्त्रीं झाडापखाला पिडिततय् निंतिं छुं उपहार ज्वना वःगु दुसाः सदनय् वयाः जानकारी बीत धासें व्यंग्य यानादिल ।
व्यवस्थापिका संसदया आइतवाःया बैठकय् विशेष ई कयाः न्ववासें नेपाली कांग्रेसया सभासद् विमलेन्द्र निधि व एमालेया सभासद् प्रदीप ज्ञवालीं बर्मेली जनतां स्वतन्त्रताया निंतिं यानाच्वंगु आन्दोलन व अनया स्वतन्त्रतावादी नेतृ आङ साङ सुकीया रिहाईया निंतिं अनया जनतां ल्ह्वंगु पालाः प्रति ऐक्यबद्धता प्वंकादिल ।
अथेहे विशेष ई कयाः न्ववानादिसें माओवादीया सभासद् सिपी गजुरेलं उच्चस्तरीय संयन्त्रया हल्ला न्यंकाः माओवादीया मागयात तंकाःछ्वयेगु षड्यन्त्र जुयाच्वंगु द्वपं बियादिल । वयेलकं माओवादीं सरकारयात माग पूवंकेत ब्यूगु लच्छिया अल्टीमेटम क्वचायेत प्यन्हू जक ल्यंदनीगु धयादिसें न्यान्हूया न्हि निसें संघर्षय् कुहावयेकगु ख्याच्वः बियादिल ।
