संस्थानया प्रमुखत पाखें राजीनामा
एकीकृत नेकपा (माओवादी) नेतृत्वया सरकारया पालेय् नियुक्त जूपिं थीथी झिगू संस्थानया प्रमुखतय्सं आइतवाः राजीनामा ब्यूगु दु ।
माओवादी नेतृत्वय् पालाय् एमालेया पाखें उद्योग मन्त्री जुयादिम्ह अष्टलक्ष्मी शाक्यं नियुक्त यापिं संस्थानया अध्यक्ष व महाप्रबन्धकतय्सं राजीनामा ब्यूगु दु । थीथी समितिया अध्यक्ष व महाप्रबन्धकं आइतवाः मंकाः रुपं पत्रकार सम्मेलन यासें राजीनामाया घोषणा याःगु खः ।
आइतवाः औद्योगिक क्षेत्र व्यवस्थापन लिमिटेड, घरेलु व साना उद्योग विकास समिति, हेटौंडा सिमेन्ट, उदयपुर सिमेन्ट लगायत संस्थानया अध्यक्ष व महाप्रबन्धकतय्सं राजीनामा ब्यूगु खः ।
राजीनामाया घोषणा याःगु पत्रकार सम्मेलनय् औद्योगिक क्षेत्र व्यवस्थापन समितिया महाप्रबन्धक गिरिराज भण्डारीयात अखिल नेपाल ट्रेड युनियन महासंघया कर्मचारीतय्सं हाकूगु मसि इलाः कुटपिट नं याःगु खः । पत्रकार सम्मेलन जुयाच्वंगु ईलय् हे उमिसं भण्डारीयात भ्रष्टाचारया द्वपं बिया हाकूगु मसि इलाः कुटपिट या:गु ख: । कर्मचारीतय् आक्रमणय् लाना: थप प्यम्ह नं घा:पा जूगु दु ।
