न्हूगु सहमति आवश्यक : खनाल
नेकपा (एमाले)या अध्यक्ष झलनाथ खनालं दलत दथुइ उच्चस्तरीय न्हूगु सहमति आवश्यक जूगु खँ धयादीगु दु ।
नारायणी अञ्चल समन्वय समितिं हेटौंडाय् आइतवाः याःगु पत्रकार सम्मेलनय् अध्यक्षं खनालं झिंनिगू बुँदे सहमति स्वयां उच्चस्तरया सहमति दलत दथुइ जुइमाःगु धयादिल । वयेकलं एनेकपा (माओवादीं) सरकारय् ब्वति कायेत च्यूताः मप्वंकूसां नं थःपिंसं सरकारय् ब्वति कायेकेगु प्रयत्न जारी त्येगु धयादिल ।
खनालं सरकार तत्काल क्वमदलीगु दाबी यानादिसें राष्ट्रिय सरकार थुकीयात हे देयेकीगु दाबी नं यानादिल । वयेकलं सरकार क्वथलीगु कासाः लगेमजुइत मेगू दलतय्त इनाप यानादिल ।
एमाले अध्यक्षं खनालं थःगु पार्टीया दुने आः नं गुट उपगुट जूगु स्वीकार यानादिसें थुकीयात दिकेगु कुतः जुयाच्वंगु धयादिल । संविधान निर्माण व शान्ति प्रकृया आःया प्रमुख मुद्दा जूगु धयादिसें अध्यक्ष खनालं दक्वं दल थुकी हे लगेजुइमाःगु बिचाः प्वंकादिल । न्हूगु सहमतिया निंतिं उच्च स्तरीय संयन्त्र गठनया पहल जुयाच्वंगु धयादिल ।
