'संविधान च्वये न्ह्यः हे माओवादी लडाकू समायोजन'
प्रधानमन्त्री माधवकुमार नेपालं माओवादी सेनाया लडाकूतय् समायोजन व पुनस्थापनाया विषयलय् सरकार गम्भीर जुसां मेमेगू पक्षं आवश्वक ग्वाहालि मया:गु खँ धयादीगु दु । वयेकलं सरकारयात गुलि याकनं ग्वाहालि दइ उलि हे याकनं शान्ति प्रकृयां पूर्णता जुइगु धयादिल ।
झिंनिक्वःगु तुल्सीदास स्मृति दिवसया लसताय् संविधान निर्माणया हाथ्या विषयस शनिवाः येँय् ग्वसाःग्वःगु ज्याझ्वःलय् न्ववानादिसें प्रधानमन्त्री नेपालं अयोग्य माओवादी लडाकूयात शिविरं लिकायेगु प्रकृया शुरु जुइधुंकूगु धयादिसें प्रमाणीकृत लडाकूतय् व्यवस्थापनयात तीव्रता बीगु धयादिल । वयेकलं दच्छिया दुने संविधान च्वयेमाःगुलिं लडाकूतय् व्यवस्थापन थ्वस्वयां न्ह्यः हे जुइगु धयादिल ।
प्रधानमन्त्री नेपालं शान्ति प्रकृया गुलि ताःहाक जुल उलि हे अप्व: आशंका जनताय् ब्वलंनीगु धयादिसें नेपाःया शान्ति प्रकृया ताःहाक यासाः थुकी दुने हे यक्वः आशंकात उत्पन्न जुइगु धयादिल । लोकतन्त्रय् थःत लगेजूगु खँ जक अन्तिम सत्य मजुइगु धयादिसें वयेकलं दक्वसियां खँ न्यनेगु व छुकी सहमति जुइ उकीया हे आधारय् न्ह्याः वनेमाःगु बिचाः तयादिल ।
दलत दथुइ गुलिखेंय् विषयलय् सहमति जुइमफुगु खँ स्वीकार यानादिसें प्रधानमन्त्री नेपालं संवेदनशील विषयलय् दक्वं पक्षया साझा मत जुइमाःगु बिचा: प्वंकादिल । वयेकलं थःगु आधिकारया माग यायेगु ईलय् मेपिनि अधिकार हनन यायेमज्यूगु खँय् बः बियादिल ।
