माओवादीया अधिवेशन माघ १५य्
वंगु झिंन्यादँ न्ह्यः निसें जुइमफुगु एकीकृत नेकपा (माओवादी)या महाधिवेशन वइगु माघ १५ गते जुइगु जूगु दु ।
लच्छि न्ह्यः निसें न्ह्यानाच्वंगु माओवादीया केन्द्रीय समिति बैठकया लिप्पांगु न्हि शनिवाः जनताया संघीय गणतन्त्र धाइगु नारा पारित यासें महाधिवेशनया मिति क्वछीगु खः । बैठकं नेतातय् निंतिं झिंन्यागू बुँदे आचारसंहिता नं लागू याःगु दु । नापं बैठकं झिंन्याम्ह दुजः दुगु केन्द्रीय सल्लाहकार समितिलय् स्वम्ह थप याना झिंच्याम्ह थ्यंकूगु दु । झाडापखाला प्रभावित क्षेत्रय् स्थास्थ्य अभियान संचालन यायेगु निर्णय नं बैठकं या:गु दु । अथेहे बैठकं नागरिक सर्वोच्चता कायम यायेत सतक व सदनं आन्दोलन यायेगु खँ क्वछीउगु दु ।
माओवादी केन्द्रीय ज्याकूथी कोटेश्वरय् जूगु केन्द्रीय समितिया पूर्ण निष्कर्ष व जिम्मेवारी बाँडफाटया बारे जानकारी माओवादी अध्यक्ष पुष्पकमल दाहाल 'प्रचण्डं' पत्रकार सम्मेलन मार्फत सार्वजनिक याइगु जूगु दु । थ्वस्वयां न्ह्यः बैठकं माओवादीयात अध्यक्षात्मक प्रणालीं बहुपदीय संरचनाय् यंकूगु खः । न्हूगु बहुपदीय संरचनाया जिम्मेवारी कथं अध्यक्षय् प्रचण्ड, वरिष्ठ उपाध्यक्षय् मोहन वैद्य 'किरण', उपाध्यक्ष डा. बाबुराम भट्टराई व नारायणजी श्रेष्ठ 'प्रकाश', महासचिवय् रामबहादुर थापा 'बादल' व सचिवय् सिपी गजुरेल व पोष्टबहादुर बोगटीयात चयन याःगु खः ।
अथेहे बैठकं पार्टी अध्यक्ष प्रचण्डया राजनीतिक प्रतिवेदनयात संशोधन यासें सर्वसम्मतं पारित याःगु खः ।
