त्रिचन्द्र गोली काण्डया निम्हेसित ज्वनः
त्रिचन्द्र क्याम्पसय् जूगु गोली काण्डय् संलग्न जूगु धकाः द्वपं बियातःपिं निम्हेसित प्रहरीं ज्वंगु दु ।
शनिवाः उगु काण्डय् संलग्न ऐनबहादुर महर व समिक बडालयात ज्वंगु खँ महानगरिय प्रहरीं परिसर येँय् नं धाःगु दु । ज्वंपिं निम्ह नेकपा (एमाले)या भातृ संगठन अनेरास्ववियुया कार्यकर्तात खः । महर व बडाल विरुद्ध प्रहरीं येँय् जिल्ला अदलतय् मुद्दा दर्ता याःगु दु ।
नेपालीं कांग्रेसया भातृ संगठन नेपाल विद्यार्थी संघया केन्द्रीय दुजः भीमिसंह गुरुङं उपिं निन्म्ह नापं अनेरास्ववियुया खुम्ह कार्यकर्तात विरुद्ध प्रहरीइ उजुरी ब्यूगु खः । गुरुङयात उगु काण्डय् गोलीं लाःगु खः ।
वंगु असार २१ गते त्रिचन्द्र क्याम्पसया भवन निर्माण ठेक्काया विषयलय् नेविसंघ व अनेरास्ववियु दथुइ ल्वापू जूगु खः । ल्वापू जूगु ईलय् महर व बडालया पुचःलं गुरुङयात गोलीं क्येकूगु दाबी नेविसंघं यानावयाच्वंगु खः ।
थुगु हे घटनाया छानबिन यायेत सरकारं सहन्यायधिवक्ता दुर्गाबन्धु पोखरेलया संयोजकत्वय् स्वम्ह दुजः दुगु छानविन समिति गठन याःगु खः । तर, समितियात छानविन याना प्रतिवेदन तयार यायेत छवाःया ई बियातःगु खसां प्रतिवेदन आः तक तयार मजुनी ।
