सवारी दुर्घटनाय् स्वम्ह सित
स्वनिगःया थीथी थासय् शुक्रवाः बहनी व शनिवाः सुथय् जूगु सवारी दुर्घटनाय् लाना स्वम्ह सिगू दु । दुर्घटनाय् सिपिं निम्ह मिजं व छम्ह मिसाः खः ।
शनिवाः सुथय् राष्ट्रपति भवन न्ह्यनय् बा. ६. च. ८३०१ नम्बरया निजी गाडीं साइकलयात ठक्कर नकूवलय् झिंन्यादँया साइकल चालक नीतबहादुर वाइबा घटना स्थलय् मदुगु खः ।
अथेहे येँय् महानगरपालिका-१४य् च्वंगु ग्याङखेलय् वा. ५. च. २७१३ नम्बरया टाटा मोबाइल गाडीं ठक्कर बियाः न्ह्यखुदँया रत्नाक्षिति महर्जन सीगु खः । ठक्कर नकाः घाःपा जुम्ह श्रेष्ठयात यलया बि एण्ड बी अस्पतालय् यंकेगु झ्वलय् ल्यँय् मदुगु खः । प्रहरीं ठक्कर नकूगु गाडी व चालकयात नियन्त्रणय् काःगु दु ।
शनिवाः हे सातदोबाटोया महालक्ष्मीस्थानय् च्वनीम्ह विदेशी नागरिक डेभिड मेडेसीं गयावःगु गाडीं हरिहरभवनय् च्वंगु साझा पेट्रोल पम्प न्ह्यने साइकलयात ठक्कर नकाः नापसं च्वंगु छेँय् न्ययावंगु खः । छेँय् ठक्कर नकूवलय् छेँय् द्ययनाच्वंम्ह पीगुदँया ईश्वरी श्रेष्ठया छयोनय् घाः लाना गम्भीर घाःपा जूगु दु । घाःपा जुम्ह क्षेष्ठयात पुल्चोय् च्वंगु अल्का अस्पतालय् वासः याकातःगु दु ।
अथेहे शुक्रवाः बहनी राष्ट्रपति भवन न्ह्यनेया सतकय् बा. ३०. प. ३६१७ नम्बरया मोटरसाइकलया चालक झिंच्यादँया आकाश काफ्ले सिगु दु । दुर्घटनाय् घाःपा जुम्ह काफ्लेयात वसः याकेत अस्पताल यंकेगु झ्वलय् ल्यँय् मदुगु खः ।
