उच्चस्तरीय राजनीतिक संयन्त्रया निंतिं प्रमुख स्वंगू दल सहमत
उच्चस्तरीय राजनीतिक संयन्त्र निर्माणया निंतिं प्रमुख स्वंगू दलत सहमत जूगु दु । संविधान सभाय् दुथ्याःगु स्वंगू तःधंगु दल एनेकपा (माओवादी), नेपाली कांग्रेस व नेकपा (एमाले)या शीर्ष नेतात उच्चस्तरीय राजनीतिक संयन्त्र गठन यायेत सहमत जुयादीगु खः ।
शनिवाः सुथय् कांग्रेस सभापति गिरिजाप्रसाद कोइरालाया निवासय् च्वंगु स्वंगू दलया शीर्ष नेतातय् बैठकं उच्चस्तरीय संयन्त्रया निंतिं गृहकार्य यायेत कार्यदल गठन यायेगु निर्णय नं याःगु दु । संयन्त्र गठनया गृहकार्यया निंतिं स्वंगू दलया निम्ह-निम्ह दुजः दुथ्याःका खुम्ह दुजः दुगु कार्यदल गठन यायेगु निर्णय याःगु खः ।
एमालें बैठकय् हे थःगु पार्टी पाखें कार्यदलय् च्वनीपिं नेतातय् नां ब्यूगु खः । एमालें कार्यदलया निंतिं उपाध्यक्ष अशोक राई व सचिव विष्णु पौडेलयात छ्वयेगु निर्णय याःगु खः । माओवादी व कांग्रेसं धाःसा शुक्रवा बहनी तक नां ढल क्वछीगु जूगु दु ।
बैठक लिपाः प्रधानमन्त्री माधवकुमार नेपालं संयन्त्र गठनया निंतिं कार्यदल गठन यायेगु सहमति जूगु धयादिल । वयेकलं कार्यदलया सुझाव कथं संयन्त्र गठन जुइगु धयादिल । अथेहे माओवादी अध्यक्ष पुष्पकमल दाहाल 'प्रचण्डं' सरकार संचालनया निंतिं मजुसें महत्वपूर्ण विषयलय् सहमति यायेगु निंतिं उच्चस्तरीय संयन्त्र गठन जुइत्यंगु धयादिल ।
