'संविधान निर्माण निर्धारित ई दुने हे'
संविधान सभा पाखें न्हूगु संविधान निर्माण यायेगु व शान्ति प्रकृयायात तार्किक निष्कर्षय् थ्यंकेगु ज्या सरकारया प्रमुख लक्ष्य जूगु व निर्धारित ई दुने हे संविधान निर्माण जुइगु खँ थीथी मन्त्रीतय्सं धायदीगु दु ।
शनिवाः धरानय् जूगु छगू ज्याझ्वःलय् न्ववानादिसें संघीय मामिला, संविधानसभा व्यवस्था व संस्कृति मन्त्री डा. मिनेन्द्र रिजालं संविधान सभाया तालिकाय् छुं ह्यूपा वःसां संविधान ईलय् हे निर्माण मजुइलाः धकाः आशंका मयायेत इनाप यानादिल । वयेकलं सरकार थुकी प्रतिबद्ध दुगु धयादिसें ईलय् हे संविधान निर्माण जुइगु धयादिल ।
ज्याझ्वलय् मन्त्री रिजालं स्पष्ट बहमुतं गठन जूगु सरकार सुयां नं इच्छां क्वमदलीगु धयादिल । वयकेलं माओवादीया सरकार थःगु हे कारणं क्वदःगु धयादिसें छुं न्हि दुने हे माओवादी नं सरकारय् समावेश जुइगु दाबी यानादिल ।
अथेहे शनिवाः हे दाङय् देउखुरी हाटेलया भवन उल्लेज्या यानादिसें सूचना व संचार मन्त्री शंकर पोखरेलं संविधान निर्माण व शान्ति प्रकृया क्वचायेकेगु आःया सरकारया प्रमुख ज्या जूगु धयादिल । वयेकलं शान्ति प्रकृया क्वचायेकेत व संविधान निर्माण यायेत दलत दथुइ सहकार्य आवश्यक जूगु धयादिसें निर्धारित ई दुने हे संविधान निर्माण जुइगु खँ धयादिल ।
