देयन्यंक १०९गू सशस्त्र पुचः : गृहमन्त्री
गृहमन्त्री भीम रावलं देयेन्यंक १०९गू सशस्त्र पुचः सक्रिय जुयाच्वंगु खँ धयादीगु दु ।
शुक्रवाः येँय् रिपाटर्स क्लबय् जूगु छगू ज्याझ्वलय् न्ववानादिसें देयन्यंक १०९गू सशस्त्र पुचः मध्ये गु आपराधिक उदेश्यं प्रेरित जूगु व गु राजनीति धइगु बारे अध्यन जुयाच्वंगु धयादिल । वयेलकं सरकारं थ्व खँया पहिचान यायेवं अपराधि पुचः विरुद्ध कारवाही यायेगु धयादिल । अधिकांश पुचः आपराधिक क्रियाकलापय् लगेजुयाच्वंगु प्रारम्भिक अध्ययनं क्यंगु खँ गृहमन्त्री जानकारी बियादिल ।
गृहमन्त्री रावलं सरकारं हःगु विशेष सुरक्षा योजना दक्वं दलया सहमतिलय् वःगुलिं कार्यान्वयन जुइगु दाबी यानादिल । वयेकलं थ्व योजना कार्यान्वयन यायेत प्रहरीया दरवन्दी थप यानाः जुसां कार्यन्वयन यानां तुं त्वतेगु धयादिल ।
आपराधिक पुचःयात सीमा वारपार जुयाः सक्रिय जुइगु ह्वताः चुमलाइगु कथं सुरक्षा योजनाया रणनीति तयार जूगु धयादिसें गृहमन्त्री रावलं भारत व चीनया सिमाया सुरक्षा योजनायात कडाइ याइगु धयादिल । वयेकलं विशेष सुरक्षा योजनायात ९२ करोड विनियोन यायेत्यनाःगु जानकारी बियादिल ।
