शान्ति प्रकृया ल्यूने लात : ल्यानग्रेन
राष्ट्र संघीय मिसन अनमिनया प्रमुख करिन ल्यानग्रेनं दलत दथुइया अविश्वास व असहमतिया कारणं नेपाःया शान्ति प्रकृया ल्यूनेलाःगु धासें च्यूता प्वंकादिल ।
न्यूयोर्कय् वंगु वाःलय् नेपाः सम्बन्धि प्रतिवेदनय् जूगु सहलह लिपाः येँय् लिहांझयादिम्ह ल्यानग्रेनं शुक्रवाः येँय् पत्रकार सम्मेलन याना थंज्याःगु च्यूताः प्वंकादीगु ख: । वयेकलं न्हापाया थीथी राजनीतिक घटनाक्रमं दलत दथुइया अविश्वास झन अप्व:गु धयादिल ।
प्रमुख दलया नेतातय्सं थःपिं नाप नापलायेगु ईलय् उच्चस्तरिय संयन्त्रप्रति प्रतिबद्धता प्वंकूगु धयादिसें वयेकलं संयन्त्रयात ग्वालिइ याइगु उपसंयन्त्र देयेकाः सम्झौतात कार्यान्वयन जू-मजूगु बारे निरन्तर निगरानी यायेत सुझाव बियादिल ।
वयेकलं अनमिनं अयोग्य ठहर याःपिं माओवादी लडाकूतय्त सेना समायोजन प्रक्रियाय् यंकेमफइगु तर्क तयादिल । वयेकलं विषेश समितियात सक्रिय याना सेना समायोजनया प्रारुप व समायोजन जुइपिं लडाकूतय् ल्याःया बारे याकनं निर्णय यायेत दलतय्त सुझाव बियादिल ।
