स्वास्थ्य मन्त्रीया राजीनामा माग
संविधान निर्माण स्वयां न्ह्य: लडाकूतय् पुनस्थापना : पौडेल
थीथी दलया सभासद्तय्सं झाडापखाला नियन्त्रणया निंतिं सरकारं माक्वः पलाः मल्ह्वंगु धासें स्वास्थ्यमन्त्रीया राजीनामा माग याःगु दु ।
व्यवस्थापिका संसदया शुक्रवाः च्वंगु बैठकया शून्य व विशेष ईलय् न्ववापिं सभासद्तय्सं देशय् झाडापखालाया महामारी जुयाच्वंगु ईलय् स्वास्थ्यमन्त्री विदेश भ्रमणय् वनाः जनताप्रति अनुत्तरदायी जूगु द्वपं ब्यूसें स्वास्थ्यमन्त्रीया राजीनामा माग याःगु खः ।
विशेष ईलय् न्ववासें एकीकृत नेकपा (माओवादी)या सभासद् मंगल विश्वकर्मां नीछगू शताब्दीलय् हैजाया कारणं थुलिमच्छिया ल्याख्य् मनूत सिगु धइगु लज्जास्पद खँ जूगु धयादिल । वयेकलं देशय् महामरी न्यंगु ईलय् सचिवया कोटाय् विदेश सयरय् वनिम्ह स्वास्थ्यमन्त्री असक्षम जूगु धायादिसें स्वास्थ्यमन्त्रीया राजीनामा माग यानादिल ।
एमालेया धिरेन्द्रबहादुर श्रेष्ठं झाडापखाला प्रभावित क्षेत्रय् खटे जुयाच्वंपिं स्वास्थ्यकर्मीत खटे जुयाच्वंगु थासं बिस्यूवंगु धयादिसें उमित कारवाही यायेत माग यानादिल । वयेकलं नं सचिवया कोटाय् मन्त्री विदेशय् भ्रमण वंगु यात जनताप्रति गैर जिम्मेवारीपन जूगु द्वपं बियादिल ।
राष्ट्रिय जनमोर्चाया चित्रबहादुर केसीं स्वास्थ्यकर्मी समेत बिस्यूवनेमाःगु स्थिति व:गु धयादिसें भगौडा स्वास्थ्यकर्मीतय्त कारवाही यायेत माग यानादिल ।
नेपाली कांग्रेसया संसदीय दलया नेता रामचन्द्र पौडेलं माओवादी सेनाया लडाकूतय् पुनस्थापना मजुसें संविधान निर्माण जुइमफइगु बिचः प्वंकादिल । वयेकलं शान्ति प्रकृयायात निष्कर्षय् थ्यंकेत थ्व न्हापांगु आवश्यकता जूगु धयादिसें थ्व जुसाः जक लोकतान्त्रिक संविधान निर्माण जुइगु दावी यानादिल ।
वयेलकं कन्टेनर खाली मजुतल्ले संविधान निर्माण सम्भव मजुइगु धयादिल । नेता पौडेलं माओवादीया लिप्पांगु ज्याखँ शान्ति प्रकृया यात निष्कर्षय् थ्यके चाहे मजुगु धकाः पुष्टि जूगु द्वपं बियादिल ।
अथेहे मधेशी जनअधिकार फोरमया सुनिताकुमारी झा व सद्भावनाया अनिलकुमार झां उपराष्ट्रपति परमानन्द झाया सपथ ग्रहण प्रति राजनीति जूगु धयादिसें भाषिक पहिचानया निंतिं जूगु मधेश आन्दोलनयात उत्तेजित देयेकेत स्वःगु द्वपं बियादिल ।
