अपराधीयात दलतय्सं हे संरक्षण बियातःगु दु : प्रधानमन्त्री

प्रधानमन्त्री माधवकुमार नेपालं देय् दुने च्वंपिं अपराधीतय्त दलतय्सं हे संरक्षण बियातःगु द्वपं बियादीगु दु ।

शुक्रवाः येँय् प्रकाश मानव अधिकार पुरस्कार वितरण समारोहलय् प्रधनामन्त्री नेपालं मानव अधिकार हनन् यायेत व अपराधीयात दलतय्सं हे संरक्षण याःगु धयादिल । वयेकलं अपराधीत आः नं समाजय् निर्धक्कपूर्वक जुयाच्वंगु धयादिसें आः उमित सरकारं कारवाही याइगु धयादिल । वयेकलं देशय् विधिया शासन लागू यानातुं त्वतेगु दाबी यानादिल ।

विद्यालययात धम्कि बीगु ज्या आपत्तिजनक जूगुलिं अज्याःगु ज्या दिकेत सरकार प्रतिबद्ध जूगु खँ प्रधानमन्त्री नेपालं धयादिल । अथेहे वयेकलं जाजरकोटय् स्थानीय प्रशासनया लापरवाहीया कारणं महामरी जूगु धयादिसें लापरवाही याइपिंत कारवाही यायेत निर्देशन बिधुंकाःगु धयादिल ।