सुरक्षा योजना लागू जुइ ला ?
येँ (सन्ध्या टाइम्स)/ सरकारं हःगु सुरक्षा अवधारणा कार्यान्वयन जुइ फइगु खँय् विज्ञतय्सं शंका प्वंकूगु दु। थ्व अवधारणां देशय् अप्वयाच्वंगु हत्या हिंसा, अपहरण, बन्द, हडताल थेंज्याःगु ज्यायात पनीगु खँय् मनूतय्सं शंका याना हःगु खः ।
पुलांम्ह गृहसचिव खेमराज रेग्मीं सरकारया थुगु योजना न्हापा थें मजुइकेगु खःसा गृहमन्त्रीयात सकस्यां ग्वाहालि यायेमाःगु खँ कनादीगु दु ।
तर पुलांम्ह अतिरिक्त प्रहरी महानिरीक्षक राजेन्द्र बहादुर सिंहं धाःसा पार्टीतय्सं अनावश्यक रुपं व या थ्व या धकाः दवाव बियाः गृहया थ्व योजना विफल याना बीगु शंका प्वंकादिल ।
थ्व योजनाय् प्रहरी अप्वयेकेगु ग्वसाः दुसां थुकिं जक समस्या ज्यनी मखु धासें सुरक्षा निकायया विज्ञतय्सं उकिया निंतिं सूचना सञ्जाल चुस्त यायेमाःगु सुझाव बिउगु दु।
राष्ट्रिय अनुसन्धान विभागया पुलांम्ह उपप्रमुख श्रीपुरुष ढकालं क्वातुगु जासुसी संयन्त्र दयेकेगु खःसा म्हो जक मनू दःसां गाःगु बिचाः प्वंकादी ।
मेम्ह पुलांम्ह अतिरिक्त महानिरीक्षक अमर नेम्वाङ्गं बन्दूक व बल छ्यलाः जक सुरक्षा बांलाके मफइगु बिचाः प्वंकादीगु दु। वय्कलं धयादी, 'मू खँ बेरोजगारी व गरिबी मदये माल, अले जक शान्ति सुरक्षा कायम जुइ ।'
