नेवाः सांस्कृतिक सम्मेलन जुइगु
येँ (सन्ध्या टाइम्स)/नेवाःतय्गु थीथी जात्रा पर्व, प्याखं, बाजं आदि चले याना वयाच्वंगु गुथितय्गु राष्ट्रिय मुँज्या याइगु जूगु दु। देशय् थज्याःगु सांस्कृतिक सम्मेलन जुइत्यंगु थ्वहे न्हापांखुसी खः ।
गुथि संस्थानया औचित्य व नेवाःतय् जात्रापर्व सञ्चालन सम्बन्धी समस्याया अध्ययन यायेत संस्कृति मन्त्रालयं गठन यानातःगु अध्ययन समितिया ग्वसालय् थ्व सम्मेलन यायेत्यंगु खः ।
सांस्कृतिक सम्मेलन यायेगु लागिं समितिं इ. मोहनकृष्ण डंगोलया अध्यक्षताय् छगू ग्वसाः खलः नं स्वनातःगु दु। उकी दुजः कथं डा. चुन्दा वज्राचार्य, सुजिव वज्राचार्य, उमेश स्थापित, कल्याण ताम्राकार, मंगलकृष्ण मानन्धर व संस्कृति मन्त्रालयया उपसचिव प्रकाश दर्नाल च्वनादीगु दु। थ्वहे श्रावण दुने यायेगु कथं ताः तयातःगु उगु सम्मेलनय् अध्ययन समितिं तयार याःगु प्रतिवेदन पेश यानाः पारित याइ ।
