मधेशीतय् पहिचान सिध्येकेत स्वःगु द्वपं

नेपाली कांग्रेसया मधेशी सभासदतय्सं मधेशीतय् पहिचान हे समाप्त जुइ कथं राज्या पुनसंरचना सम्बन्धी प्रतिवेदन तयार मयायेत ख्याच्वः ब्यूगु दु ।

कांग्रेस उपसभापति गोपालमान श्रेष्ठया संयोजकत्वय् गठित राज्य पुनसंरचना समितिं पार्टीया केन्द्रय समितिइ न्ह्यब्वःगु प्रतिवेदन अपूर्ण जूगु धासें बृहत सहलह लिपा जक पारित यायेमाःगु माग मधेशी सभासद्तयसं याःगु दु ।

पार्टीया केन्द्रीय ज्याकू सानेपाय् जारी कांग्रेसया केन्द्रीय समितिया शुक्रवाःया बैठकय् मधेशी सभासद्तय्सं सुझाव ब्यूसें प्रतिवेदनयात बृहत सहलह लिपा जक प्रतिवेदन बारे निर्णय यायेत माग याःगु खः । प्रतिवेदनय् सहलह मयासें गथे खः अथेहे पारित यासाः संविधानसभाय् फरक मत तयेगु ख्याच्वः तकं उमिसं ब्यूगु दु ।