प्रचण्डया प्रतिवेदन पारित
अध्यक्षात्मक प्रणली पाखें बहुपदीय संरचनाय्
एकीकृत नेकपा (माओवादी)या केन्द्रय समितिया बैठकं अध्यक्ष पुष्पकमल दाहाल 'प्रचण्ड'या राजनीतिक प्रतिवेदन व विधान संशोधन सहित पारित याःगु दु ।
बिहीवाः माओवादीया केन्द्रीय ज्याकू कोटेश्वरय् च्वंगु केन्द्रय समितिया बैठकं विधान संशोधन नापं माओवादीयात अध्यक्षात्मक प्रणलीं बहुपदीय संरचनाय् यंकूगु दु । न्हूगु कार्य विभाजन कथं अध्यक्षय् प्रचण्ड, वरिष्ठ उपाध्यक्षय् मोहन वैद्य 'किरण', उपाध्यक्षय् डा. बाबुराम भट्टराई व नारायणकाजी श्रेष्ठ 'प्रकाश', महासचिवय् रामबहादुर थापा 'बादल', सचिवय् पोष्टबहादुर बोगटी व सीपी गजुरेलयात चयन याःगु दु ।
केन्द्रीय समितिया बैठकय् अध्यक्षया प्रतिवेदनय् ब्यापक सहलह लिपा प्रतिवेदन पारित याःगु खः । अध्यक्षया प्रतिवेदनय् न्हूगु संविधान व शान्ति प्रकृयायात केन्द्रय् तया राष्ट्रिय सरकार गठनय् यायेमाःगु खँय् बः बियातःगु दु । प्रतिवेदनय् मोहन वैद्य पक्षधरं जनविद्रोह दुमथ्याकूगु धासें असन्तुष्टि प्वंकूगु खः । तर अध्यक्षं जनविद्रोहया विकल्प ल्यँ दनीगु धाःगुलिं प्रतिवेदनय् सहमति जूगु खः ।
शुक्रवाः च्वनीगु समितिया बैठकय् नेतातय् आचारसंहिता व नेतृत्वया कार्यशैली सुधार बारे सहलह जुइगु जूगु दु ।
