माओवादी लडाकूतय्त सेनाय् समायोजन यायेमफइगु : गच्छदार
न्हूगु गठन जूगु मधेशी जनअधिकार फोरम नेपाल लोकतान्त्रिकया अध्यक्ष व उपप्रधानमन्त्री विजयकुमार गच्छदारं माओवादी लडाकूतय्त नेपाली सेनाय् समायोजन यायेमफइगु खँ धयादीगु दु ।
बिहीवाः येँय् जूगु छगू ज्याझ्वःलय् न्ववानादिसें उपप्रधामन्त्री गच्छदारं माओवादी लडाकूयात नेपाली सेनय् प्रवेश याकेमज्यूगु धयादिसें समायोजन धइगु खँग्वः प्रति असहमति प्वंकादिल । वयेकलं लडाकूत राजनीतिक रुपं प्रशिक्षित जूगुलिं सेनालय् बाहेक मेथाय् हे पुनस्थापना यायेमाःगु धयादिल ।
न्हूगु फोरम लोकतान्त्रिकया अध्यक्ष गच्छदारं थःगु दल देय्या प्यंगूगु तःधंगु दल जूगु दाबी यानादिसें लोकतन्त्रयात सुदृढ याना ईलय् हे संविधान निर्माण यायेगु धयादिल । वयेकलं फोरम लोकतान्त्रिकय् नीगुम्ह सभासद् व फोरमया झिंगुम्ह केन्द्रीय दुजःत दुगु दाबी यानादिल ।
अथेहे उपराष्ट्रपतिया सपथया बारे सर्वोच्चं याःगु फौसला गैरकानुनी जूगु ठहर यानादिसें हिन्दीं जक मखु देय् दुने ल्हाइगु दक्वं भासं सपथ कायेदेयेमाः धयादिल ।
