नेपाः पार्टीया सु सु गन गन ?
येँ (सन्ध्या टाइम्स)/देय्या थीथी स्थानीय निकायय् आः गठन जुइगु सर्वदलीय संयन्त्रय् नियुक्त जुइपिं नेपाः राष्ट्रिय पार्टीया दुजःत क्वःछिउगु दु ।
नेपाः पार्टीया नकतिनि च्वंगु मुँज्यां येँ जिविसय् पार्टीपाखें शान्तप्रकाश श्रेष्ठ, येँ मनपाय् मनोज नेवाः खड्गी, यल जिविसय् सुरेश प्रधान, यल उपमनपाय् किरण शाक्य, किपू नपाय् कृष्णहरि महर्जन व सक्वया वज्रयोगिनी गाविसय् राजेश्वरमान श्रेष्ठयात छ्वयेगु निर्णय याःगु दु ।
गुगु पार्टीपाखें छु छु क्षेत्रय् प्रत्यक्ष चुनावय् उम्मेदवारी बिउगु खः उगु उगु लागाया स्थानीय निकायय् गठन जुइगु सर्वदलीय संयन्त्रय् सम्बद्ध पार्टीया प्रतिनिधि दुथ्याकेगु सहमति जू कथं नेपाः राष्ट्रिय पार्टीयात निगू जिविस, स्वंगू नपा व छगू गाविसय् सीट प्राप्त जूगु खः ।
पार्टीपाखें थःपिंसं ल्ययापिं प्रतिनिधितय्सं पालना यायेमाःगु छगू आचारसंहिता नं पारित याःगु दु। संहिताय् पार्टीया प्रतिनिधितय्सं पूर्ण रुपं पार्टी निर्देशन पालना यायेमाःगु, पार्टीं खुलाय् छकः उमिगु ज्याया मूल्यांकन यायेगु, पारदर्शिता नालेगु व आर्थिक स्वच्छता कायम यायेगु, थःपिंत वइगु भत्ताया बछि दां पार्टीइ बुझे यायेगु व सम्बद्ध स्थानीय निकायपाखें नेपालभाषा व नेवाः जातिया हितय् यायेफइगु हरेक ज्या याना यंकेगु खँ दुथ्याः ।
