स्वलाया ५८० गू बन्द !
येँ (सन्ध्या टाइम्स)/ वंगु स्वलाया दुने ५८० क्वः बन्द जूगु व ४६५ क्वः सडक अवरुद्ध जूगु खँ गृहमन्त्री भिम रावलं कनादीगु दु ।
म्हिगः विशेष सुरक्षा योजनाया बारे सदनयात जानकारी बीगु झ्वलय् वय्कलं उगु खँ धयादीगु खः। वंगु फागुनंनिसें बैशाख तक स्वलाया दुने थ्व बन्द जूगु खः।
विशेष सुरक्षा योजना कथं आपराधिक गतिविधि अप्वः जुइगु थासय् आः 'कर्डन एन्ड सर्च' अपरेशन न्ह्याकेगु व प्रहरी गस्ति अप्वयेकेगु खँ दुथ्याः ।
अथे हे राजधानी येँया विमानस्थलय् विशेष सुरक्षा योजना लागू यायेगु, संवेदनशील क्षेत्रय् सीसीटिभी जडान यायेगु, थाय्थासय् आकस्मिक जाँच यायेगु, ल्वाभः ज्वनीपिं सुरक्षाकर्मीतय्त आः मोटरसाइकलपाखें समेत गस्ती परिचालन याकेगु व गुप्तचरत बढे यायेगु ग्वसाः नं दुथ्याः।
योजना कार्यान्वयन यायेगु निंतिं सुरक्षाकर्मीया दरबन्दी अप्वयेकेगु योजना नं सरकारं दयेकूगु दु ।
गृहमन्त्रीं म्हिगः सदनय् न्ह्यब्वःगु प्रतिवेदनय् झिंछलाया दुने १० दशमलव ७ प्रतिशतं अपराध अप्वःगु व अपहरणया घटना जक २५० प्रतिशतं अप्वःगु खँ धयातःगु दु।
मन्त्रिपरिषद्या बैठकं विशेष सुरक्षा योजनायात म्हिगः निसें लागू यायेगु निर्णय नं याःगु दु ।
